Ikinagalak ni Romblon Lone District Representative Eleandro Jesus “Budoy” F. Madrona ang inisyatiba ng Anakalusugan Party-list matapos magpatayo ng dalawang solar-powered water systems sa Barangay Sto. Niño at Barangay Camandag sa bayan ng Looc.
Sa kanyang mensahe kasunod ng inagurasyon, binigyang-diin ni Madrona na ang tubig ay isa sa pinakaimportanteng pangangailangan ng bawat Romblomanon, kaya’t malaking bagay na magkaroon ng malinis at maaasahang mapagkukunan nito.
“Ang tubig ay buhay, water is life. Hindi lamang basta tubig kundi tubig na malinis at healthy,” pahayag ng kongresista, sabay pasasalamat kay Anakalusugan Party-list Representative Rey Reyes sa paglulunsad ng proyekto.
Ayon kay Madrona, ang kakulangan sa suplay ng malinis na tubig ay isa sa mga pangunahing suliranin sa ilang bahagi ng lalawigan, kaya’t malaking tulong ang nasabing mga water system na gumagamit ng solar power, isang mas matipid at sustainable na teknolohiya.
Nagpasalamat din ang kongresista kay Reyes sa pagpili sa Romblon bilang isa sa mga benepisyaryo ng programa at sa patuloy na pagbibigay-pansin sa kalusugan at kapakanan ng mga mamamayan.
Inaasahang magbibigay ang dalawang solar-powered water systems ng mas maayos, tuloy-tuloy, at ligtas na suplay ng tubig para sa mga kabahayan at komunidad sa nasabing mga barangay.
