Isinusulong ng Romblon State University (RSU) ang pagkilala rito bilang kauna-unahang Archipelagic University sa Pilipinas, na gagamit sa natatanging heograpiya, likas na yaman at pangangailangan ng mga komunidad sa kapuluan ng Romblon bilang batayan ng pagpapaunlad ng mataas na edukasyon.
Ayon kay RSU President Merian P. Catajay-Mani, mahalagang palakasin ng unibersidad ang sariling identidad sa halip na umasa lamang sa mga pamantayan ng rankings at iba pang sukatan ng akademikong pagganap.
“Romblon State University is a league of its own,” ani Mani, na binigyang-diin na natatangi ang RSU dahil sa heograpiya ng Romblon bilang isang kapuluan.
Ayon sa kanya, nais ng unibersidad na gamitin ang katangiang ito bilang bentahe at maging huwaran para sa iba pang institusyong pang-edukasyon na may kahalintulad na heograpikal na kalagayan.
Kabilang sa mga hamong nais bigyang-pansin sa pagsusulong ng konsepto ang pamamahala sa magkakahiwalay na isla, koneksiyon at komunikasyon, at paghahatid ng mga serbisyong pang-edukasyon sa mga komunidad na pinaghihiwalay ng dagat.
Kasabay nito, isinusulong ng RSU ang pagpapaunlad ng blue-green economy ng lalawigan, na nakatuon sa likas na yaman ng lupa at karagatan. Kabilang sa mga larangang nais bigyang-pansin ang marine biology at engineering, partikular sa pangangalaga sa kapaligiran, climate change adaptation at pagpapalakas ng katatagan ng mga komunidad laban sa mga sakuna.
Binigyang-halaga rin ang papel ng mga alumni sa paghubog ng direksiyon ng unibersidad at sa pag-uugnay ng kanilang mga karanasan at oportunidad sa mga kasalukuyang mag-aaral.
Sa pamamagitan ng konsepto ng Archipelagic University, layunin ng RSU na bumuo ng mas angkop na direksiyon sa edukasyon at pananaliksik na nakabatay sa mga pangangailangan ng mga pamayanang isla.
Kung maisusulong, inaasahang maipakikilala ng RSU ang karanasan ng Romblon bilang kapuluan bilang mahalagang batayan sa pag-aaral at pagpapaunlad ng mga komunidad na may katulad na katangiang heograpikal.
