Nagpasa ng resolusyon ang Romblon Provincial Board na humihimok sa mga kinauukulang ahensya ng pamahalaan at telecommunications companies na pagbutihin ang mobile signal at internet connectivity sa Batangas Passenger Terminal.
Kabilang sa mga tinukoy sa resolusyon ang Philippine Ports Authority (PPA), Asian Terminals Inc. (ATI), Department of Information and Communications Technology (DICT), National Telecommunications Commission (NTC), Globe Telecom, Smart Communications at DITO Telecommunity.
Layunin ng resolusyon na matugunan ang mga reklamo ng mga pasahero hinggil sa mahinang signal at internet connection sa terminal, na nagsisilbing pangunahing daanan ng mga biyaherong patungo at nagmumula sa lalawigan ng Romblon.
Sa mga naunang pahayag sa social media, ilang pasahero ang nagpahayag ng kanilang hinaing tungkol sa mahinang connectivity habang naghihintay ng kanilang biyahe.
“Korek.. total naman mataas na po yung terminal fee ninyo.. sana naman may improvement na po,” komento ni Rowena Elardo.
Ibinahagi rin ni Jomaica Romero ang pangangailangan ng maayos na koneksyon, lalo na sa mga pasaherong naghihintay nang ilang oras bago ang pag-alis ng barko.
“Yess plssss, ilang hours din ang paghihintay bago umalis ang barko, actionnn,” ani Romero.
Tinalakay ang resolusyon sa isinagawang 34th Regular Session ng Provincial Board sa Provincial Capitol sa Romblon, kung saan binigyang-diin ang kahalagahan ng maaasahang internet access para sa mga pasahero, manggagawa, negosyo at operasyon ng terminal.
Inaasahang makatutulong ang pagpapabuti ng mobile signal at internet connectivity upang magkaroon ng mas maaasahang komunikasyon at digital access ang mga pasaherong naghihintay ng kanilang biyahe sa Batangas Passenger Terminal.
