Inatasan ng Pamahalaang Panlalawigan ng Romblon ang lahat ng ospital ng gobyerno sa lalawigan na magtatag at magpanatili ng hindi bababa sa isang Indigenous Peoples (IP) Friendly Room upang matiyak ang mas angkop, inklusibo at walang diskriminasyong serbisyong pangkalusugan para sa mga katutubo.
Nakasaad ito sa Provincial Ordinance No. 22, Series of 2026, na pinagtibay ng Sangguniang Panlalawigan noong September 25, 2026.
Sa ilalim ng ordinansa, kailangang makapagtatag ang mga ospital ng gobyerno ng hindi bababa sa isang IP-friendly room sa loob ng 12 buwan mula sa pagiging epektibo ng ordinansa.
Layunin ng panukalang pasilidad na magbigay ng serbisyong pangkalusugan na kumikilala at gumagalang sa kultura, paniniwala, tradisyon at natatanging pangangailangan ng mga katutubo, alinsunod sa Republic Act No. 8371 o Indigenous Peoples Rights Act of 1997 at iba pang umiiral na batas.
Kabilang sa mga minimum na pamantayan ng IP-friendly rooms ang sapat na espasyo para sa mga pasyenteng katutubo at kanilang mga kasama, mga materyales na nagbibigay ng impormasyon tungkol sa karapatan ng pasyente at serbisyong pangkalusugan, at mga karatula sa Filipino at, kung posible, sa lokal na wika o diyalektong nauunawaan ng mga komunidad ng IP.
Inaatasan din ang mga ospital na, hangga't maaari, isaalang-alang ang mga gawaing pangkultura at tradisyon ng mga katutubo, basta't hindi nito malalabag ang mga pamantayan sa kalusugan, kaligtasan, mga medikal na protocol at regulasyon ng ospital.
Sa ilalim ng ordinansa, kailangang sumailalim sa regular na oryentasyon at pagsasanay ang mga kawani ng ospital, partikular ang mga direktang nagbibigay ng pangangalaga sa pasyente, tungkol sa karapatan ng mga katutubo, pagiging sensitibo sa kultura at walang diskriminasyong paghahatid ng serbisyong pangkalusugan.
Ang Provincial Health Office, katuwang ang National Commission on Indigenous Peoples (NCIP), Provincial Indigenous Peoples Mandatory Representative at iba pang kinauukulang sektor, ang mangangasiwa sa pagbuo ng implementing rules and regulations sa loob ng 90 araw mula sa pagiging epektibo ng ordinansa.
Inaatasan din ang Provincial Health Office na subaybayan ang pagpapatupad nito at magsumite ng taunang ulat sa Sangguniang Panlalawigan.
Nakasaad sa ordinansa na maaaring patawan ng kaukulang administratibong parusa ang sinumang opisyal o kawani ng pamahalaan na mapatunayang nagpabaya o sadyang hindi sumunod sa mga probisyon nito, nang hindi inaalis ang posibleng pananagutang sibil o kriminal sa ilalim ng umiiral na batas.
Nilalayon ng ordinansa na mapangalagaan ang karapatan at kapakanan ng mga katutubo sa Romblon sa pamamagitan ng mas pantay, naa-access at sensitibo sa kulturang serbisyong pangkalusugan.
