Hinikayat ng Malacañang ang publiko na manatiling kalmado ngunit maagang maghanda para sa posibleng epekto ng El Niño, habang tiniyak na nakahanda ang pamahalaan na tumugon sa maaaring epekto nito, kabilang ang mga usapin sa suplay ng tubig.
Sa Palace press briefing, sinabi ni Presidential Communications Office (PCO) Undersecretary at Palace Press Officer Claire Castro na nakapaghanda na ang pamahalaan ng mga hakbang para tugunan ang epekto ng El Niño, kabilang ang assistance para sa mga magsasaka at mangingisda.
Ayon kay Castro, hindi na bago sa Pilipinas ang El Niño at may karanasan na ang pamahalaan sa pagtugon dito, kabilang ang pagbuo ng Task Force El Niño noong 2024.
Gayunman, hinikayat niya ang publiko na maghanda nang maayos ngunit iwasang mag-panic o mag-hoard ng mga pangunahing pangangailangan.
Partikular na pinayuhan ni Castro ang publiko na huwag mag-imbak nang labis ng bottled water dahil wala namang kasalukuyang naiulat na kakulangan sa suplay ng inuming tubig.
“Ang pag-iipon ng tubig, tama naman, pero hindi sa pamamaraan na kailangan mag-hoard ng mga mineral water na mabibili ninyo. Hindi ’yan tamang paghahanda,” ani Castro.
Nagbabala rin siya na maaaring makaapekto sa suplay at presyo ang panic buying at labis na pag-iimbak ng bottled water.
Samantala, inanunsyo ng National Water Resources Board (NWRB) na ibababa ang water allocation para sa Metro Manila mula 52–53 cubic meters per second (cms) patungong 44 cms simula October dahil sa posibleng epekto ng El Niño.
Ayon kay Castro, patuloy na imo-monitor ng pamahalaan ang sitwasyon at makikipag-ugnayan sa mga concerned government agency upang matiyak ang maagap na pagtugon sa anumang epekto ng weather phenomenon.
“Ang kailangan lang talaga natin ay mag-prepare, at ’yun ang ginagawa ng gobyerno,” ani Castro.
