Tinalakay ng Department of Trade and Industry (DTI) Romblon ang mga aktibidad para sa pagdiriwang ng Consumer Welfare Month ngayong October, na may temang “Safe Products, Confident Consumers: Raising Standards for Safe Products and Stronger Consumer Confidence.”
Sa ginanap na Kapihan sa PIA Romblon, ipinaliwanag ni DTI Romblon Officer-in-Charge Provincial Director Orville Mallorca na nakatuon ang pagdiriwang sa pagtiyak na ang mga produktong sakop ng mandatory certification ng Bureau of Philippine Standards (BPS) ay sumusunod sa mga itinakdang requirement ng batas.
“Ang focus natin this year is we ensure na itong ating mga products covered by mandatory certification ng ating Bureau of Philippine Standards ay compliant sa requirement ng batas,” pahayag ni Mallorca.
Binigyang-diin din niya ang papel ng mga mamimili sa pagpapatuloy ng operasyon ng mga negosyo at ang pangangailangang mapanatili ang proteksyon sa kanilang mga karapatan.
“Sila ‘yung bumubuhay sa business. While we develop business… ayaw natin na maiwan din naman ‘yung proteksyon ng ating mga consumers,” dagdag niya.
Kabilang sa mga aktibidad na tampok ngayong Consumer Welfare Month ang Consumer Wellness Walk and Zumba, In-store Diskwento Caravan, FTL Monitoring and Enforcement, at mga Consumer Education and Information activities.
Patuloy din ang consumer protection activities ng DTI, kabilang ang pagbibigay ng impormasyon sa mga mamimili at business sector hinggil sa mga umiiral na batas at mga ipinagbabawal na produkto o gawain.
Sa panayam, sinabi ni Mallorca na isa pa lamang ang consumer complaint na na-adjudicate ng kanilang tanggapan ngayong taon, kumpara sa mas marami noong mga nakaraang taon.
“This year so far, iisa pa lang ‘yung na-adjudicate namin na consumer complaints, unlike before talaga na medyo marami,” ani Mallorca.
Ipinaliwanag niya na kabilang sa mga programa ng DTI ang pagbibigay ng impormasyon hindi lamang sa consumers kundi maging sa business sector upang malaman ng mga negosyante ang mga batas at requirement na dapat sundin.
“We do not only educate the consumers, we also educate the business sector, kung ano ‘yung mga bawal. Kasi, hindi naman kasi pwede mag-enforce ka without informing the stakeholders, kung ano ‘yung mga batas na pinaiiral natin,” dagdag niya. mallorca draft transcript
