Hinikayat ng Department of Trade and Industry (DTI) Romblon ang mga kabataan sa lalawigan, partikular ang mga may kasanayan sa Information Technology (IT), na gamitin ang kanilang kaalaman at talento upang makapagsimula ng sariling negosyo at tech startups.
Sa ginanap na Kapihan sa PIA na inorganisa ng Philippine Information Agency (PIA) Romblon, sinabi ni DTI Romblon Officer-in-Charge Provincial Director Orville Mallorca na may oportunidad para sa mga kabataang may kaalaman sa IT na gamitin ang kanilang kasanayan sa pagnenegosyo.
“Marami ngayon ang babata pa ay kumikita na sa online business, meron ‘yong mga dahil lang sa experience ay nagiging developer, mga system developer,” ani Mallorca.
“Sa mga kabataan, ang dami nating ‘yong mga nasa IT, sa field ng IT. So ito ‘yong in-encourage namin sa mga IT practitioner, nung mga may mga course, nasa IT,” dagdag niya.
Kabilang sa mga maaaring pasuking serbisyo ng mga IT practitioner ang software development, website creation at iba pang digital solutions na maaaring ialok sa mga lokal na negosyo at komunidad.
Ayon sa DTI, nagbibigay din ang ahensya ng suporta at pagsasanay sa mga kabataang nasa legal na edad na nais magsimula ng negosyo sa pamamagitan ng Youth Entrepreneurship Program (YEP).
Hinikayat din ni Mallorca ang mga Sangguniang Kabataan (SK) at mga lokal na kooperatiba na maging katuwang sa pagtataguyod ng youth entrepreneurship programs at coop laboratories upang mabigyan ng karagdagang oportunidad ang mga kabataan, kabilang ang mga out-of-school youth.
“Sana hindi lang nila tuturuan ang mga SK ng pag-referee at saka ng pag-pickleball. Turuan din nila ng pagne-negosyo,” ani Mallorca.
