Arestado ang Rank No. 8 Regional Most Wanted Person ng MIMAROPA kaugnay ng limang bilang ng Statutory Rape sa isinagawang manhunt operation sa Barangay Pato-o, Odiongan, Romblon noong September 9, 2026.
Isinagawa ang pag-aresto bandang 2:20 ng hapon sa bisa ng Warrant of Arrest para sa 5 counts ng Statutory Rape sa ilalim ng Article 266-A, Paragraph 1(d) ng Revised Penal Code, na inamyendahan ng Republic Act No. 11648. Walang inirekomendang piyansa para sa mga naturang kaso.
Matapos ang pagkakaaresto, dinala ang wanted person sa kustodiya ng CIDG Romblon Provincial Field Unit (PFU) para sa dokumentasyon at kaukulang disposisyon.
Naging bahagi ng operasyon ang CIDG Romblon PFU, Odiongan Municipal Police Station (MPS), Regional Intelligence Unit 4B–Provincial Intelligence and Targeting Team (RIU 4B-PIT) Romblon, Regional Intelligence Team (RIT) Romblon, mga intelligence team mula Oriental Mindoro at Marinduque, Police Intelligence Unit (PIU) Romblon, at Odiongan Maritime Law Enforcement Team.
Ayon kay PBGEN Christopher R. Dela Cruz, Regional Director ng PRO MIMAROPA, ipinapakita ng pagkakaaresto ang patuloy na pagtutulungan ng mga law enforcement unit sa pagtugis sa mga wanted person at pagpapatupad ng mga kautusan ng hukuman.
Patuloy namang pinaiigting ng PRO MIMAROPA ang intelligence-driven operations laban sa mga wanted person upang matunton at maiharap sa kaukulang legal na proseso ang mga indibidwal na hinahanap ng batas.
