Nagsagawa ang Philippine Red Cross (PRC), katuwang ang Red Cross Youth Council ng Romblon State University–San Fernando Campus (RSU-SFC), ng blood donation drive, HIV education session at libreng confidential HIV testing noong September 23, 2026 sa RSU-SFC Function Hall.
Layunin ng aktibidad na mailapit sa komunidad ng unibersidad ang mahahalagang serbisyong pangkalusugan at impormasyon, partikular sa blood donation at HIV prevention.
Pangunahing bahagi ng programa ang blood donation drive na naglalayong hikayatin ang mga kwalipikadong indibidwal na magbigay ng dugo para sa mga pasyenteng maaaring mangailangan nito sa panahon ng emergency o gamutan.
Kasabay nito, isinagawa ang Blood Health Seminar kung saan tinalakay ang kahalagahan ng blood donation, proseso ng pagbibigay ng dugo at pagpapanatili ng mabuting kalusugan para sa mga nais maging blood donor.
Nagkaroon din ng HIV Awareness Talk na nagbigay ng impormasyon hinggil sa HIV transmission, prevention at testing, pati na rin sa kahalagahan ng tamang impormasyon upang maiwasan ang maling paniniwala at stigma tungkol sa HIV.
Bukod dito, binigyan ang mga kalahok ng pagkakataong sumailalim sa libreng at confidential na HIV testing upang boluntaryang malaman ang kanilang HIV status, habang pinangangalagaan ang kanilang privacy at confidentiality.
Nakiisa rin sa pagsasagawa ng programa ang mga miyembro at opisyal ng Red Cross Youth Council ng RSU-SFC, na nagbigay-diin sa mahalagang papel ng kabataan sa humanitarian service at health advocacy sa loob ng campus.
Sa pamamagitan ng blood donation, tamang kaalaman tungkol sa HIV at responsableng pagpapasya sa kalusugan, ipinakita ng aktibidad na maaaring makibahagi ang bawat isa sa pangangalaga sa kalusugan at kapakanan ng kapwa.
Layon din ng programa na mapalakas ang volunteerism, community service at health advocacy sa RSU-SFC community. (with reports from Princess Mae Ballera)
Discussion about this post