Iginiit ni Oriental Mindoro Governor Humerlito “Bonz” Dolor na mananatiling buo at nagkakaisa ang MIMAROPA, sa kanyang Facebook post noong Biyernes, September 11.
Nasa Palawan sina Dolor at ang mga gobernador ng iba pang lalawigan ng MIMAROPA noong September 10 hanggang 11 upang dumalo sa mga aktibidad ng Regional Development Council (RDC).
Binigyang-diin din niya ang pagkakaisa ng limang lalawigan ng rehiyon.
“Ang MIMAROPA ay mananatiling buo at nagkakaisa ano man ang mangyari sa mga susunod na panahon,” pahayag ni Dolor.
Ang pahayag ni Dolor ay inilabas isang araw matapos ihayag ni Department of the Interior and Local Government (DILG) Secretary Jonvic Remulla sa Senate Finance Subcommittee J ang panukala ng kagawaran na baguhin ang kasalukuyang setup ng Region 4B o MIMAROPA.
Sa naging pahayag ni Remulla noong Huwebes, September 10, sinabi niyang nais ng DILG na ibalik sa Region 4 ang mga lalawigang kasalukuyang bumubuo sa MIMAROPA, ngunit hatiin ang mga ito sa magkakaibang command centers.
Layunin umano ng panukala na gawing mas episyente at responsive ang paghahatid ng serbisyo ng pamahalaan, lalo na sa mga lalawigang pulo na may mga hamon sa transportasyon at accessibility.
Sa ilalim ng iminungkahing setup, kabilang sa isang cluster ang Quezon, Marinduque at Romblon, habang ang iba pang lalawigan ay isasama sa magkakahiwalay na cluster.
Gayunman, hindi tahasang sinabi ni Dolor sa kanyang Facebook post na ang kanyang pahayag ay tugon sa panukala ni Remulla.
Sa kanyang post, binanggit din ni Dolor ang mga kapwa gobernador na sina Eduardo Gadiano ng Occidental Mindoro, Melecio Go ng Marinduque, Trina Alejandra Que Firmalo-Fabic ng Romblon at Amy Alvarez ng Palawan.
Tinapos ni Dolor ang kanyang post gamit ang #OneMIMAROPA, na nagpapakita ng kanyang panawagan para sa pagkakaisa ng Oriental Mindoro, Occidental Mindoro, Marinduque, Romblon at Palawan.
