Dalawang residente ng Sibuyan, Romblon ang kabilang sa mga patuloy na hinahanap matapos masunog ang M/V June Aster habang naglalayag mula Manila patungong Coron, Palawan noong September 9.
Kinilala ang mga nawawala na sina John Rey Marin, 35, at Jonas Rivas, 28, kapwa residente ng Sibuyan at mga trabahador ng Alumpich Company mula Cavite.
Ayon sa panawagan ng kanilang kaanak na si Ton Formilles, nagtungo umano ang dalawa sa Coron upang bumisita sa kanilang project site nang sumakay sa barko mula Manila.
Batay sa pinakahuling ulat ng Philippine Coast Guard (PCG), 42 katao na ang nailigtas habang lima ang naiulat na nasawi, ngunit patuloy pa rin ang search and rescue operation dahil tinatayang 87 katao pa ang hindi natutukoy o nawawala mula sa kabuuang 134 na nakalista sa manifest ng barko.
Sa mga nailigtas, 38 ang mga pasahero at apat ang crew, ayon sa PCG. Gayunman, binigyang-diin ng Coast Guard na pansamantala pa ang mga bilang habang nagpapatuloy ang operasyon at pagtukoy sa mga pasahero at tripulante.
Nasunog ang M/V June Aster noong gabi ng September 9 sa karagatang sakop ng Coron, Palawan, humigit-kumulang 1.2 nautical miles northeast ng Barangay Marcilla. Ayon sa mga awtoridad, patuloy pa ring iniimbestigahan ang sanhi ng insidente.
Discussion about this post