Naglaan ang Technical Education and Skills Development Authority (TESDA) Romblon Provincial Office ng 165 scholarship slots para sa mga residente ng San Andres sa ilalim ng iba't ibang scholarship at skills training programs ngayong 2026.
Ayon kay Zarah Faa, kinatawan ng TESDA Romblon, kabilang sa mga available na qualification ang Organic Agriculture Production NC II, Hilot (Wellness Massage) NC II, Bartending NC II, Driving NC II, Shielded Metal Arc Welding (SMAW) NC II, at Carpentry NC II.
Batay sa listahan ng TESDA Romblon, may mga scholarship at training programs nang natapos, kasalukuyang isinasagawa, at nakatakda pang ilunsad para sa mga kwalipikadong residente ng bayan.
Kasabay nito, maaari ring samantalahin ng mga skilled workers sa San Andres ang libreng Competency Assessment and Certification for Workers (CACW) program ng TESDA.
Kabilang sa libreng assessment ang Driving (Passenger Bus/Straight Truck) NC III na may 20 slots, Driving NC II na may 40 slots, at Hilot (Wellness Massage) NC II na may 30 slots.
Hinikayat ni Faa ang mga residenteng may kasanayang nakuha sa pamamagitan ng trabaho, impormal na pagsasanay o nakaraang technical-vocational training na magpa-assess upang magkaroon ng kaukulang national certification.
Ibinahagi rin niya ang mga programa ng TESDA sa ginanap na PIA Romblon Information Caravan sa Barangay Mabini noong Agosto 28, kung saan inilapit sa mga residente ang iba't ibang oportunidad para sa skills training, scholarship at certification.
Maaaring makipag-ugnayan ang mga interesadong residente sa TESDA Romblon Provincial Office para sa mga kinakailangang dokumento, iskedyul ng assessment at iba pang available na scholarship at training programs.
