Umabot sa 150 kliyente ang nabigyan ng serbisyo ng Social Security System (SSS) Odiongan Branch sa isinagawang SSS on Wheels sa bayan ng San Andres noong Agosto 27.
Layunin ng aktibidad na mailapit sa mga residente ang iba't ibang serbisyo at programa ng SSS upang mas maging madali para sa kanila ang pag-access sa mga benepisyo at iba pang transaksyon sa ahensya.
Ayon sa lokal na pamahalaan ng San Andres, bahagi ito ng patuloy na pakikipagtulungan nito sa mga national government agencies upang mailapit ang mahahalagang serbisyo ng pamahalaan sa mga mamamayan.
Nagpatuloy naman ang pagbibigay-kaalaman tungkol sa mga programa at serbisyo ng SSS sa isinagawang PIA Romblon Information Caravan sa Barangay Mabini noong Agosto 28, kung saan dumalo rin ang mga kinatawan ng SSS Odiongan Branch.
Ayon kay Christine Riano, Corporate Executive Officer II ng SSS Romblon, bukas ang kanilang tanggapan sa mga miyembro at sa iba pang indibidwal na nais magtanong, magpa-assist, o mag-avail ng mga serbisyong iniaalok ng SSS.
Tinalakay rin sa aktibidad ang kahalagahan ng pagiging miyembro ng SSS at ang iba't ibang benepisyong maaaring ma-avail ng mga kwalipikadong miyembro, kabilang ang mga benepisyong may kaugnayan sa pagkakasakit, panganganak, pagkabalda, pagreretiro at pagkamatay, alinsunod sa mga umiiral na patakaran ng ahensya.
Hinimok ni Riano ang mga manggagawa, self-employed individuals, at iba pang maaaring maging miyembro na alamin ang kanilang mga opsyon sa ilalim ng SSS upang magkaroon ng social security protection at maging kwalipikado sa mga benepisyo sa oras ng pangangailangan.
Binigyang-diin din niya ang kahalagahan ng pagpapanatiling updated ng membership records at ng regular na paghuhulog ng kontribusyon upang matiyak ang pagiging kwalipikado sa mga benepisyo at programa ng SSS.
Isinagawa ang Information Caravan sa pakikipagtulungan ng Public Information Office ng LGU San Andres, SSS Odiongan, TESDA Romblon, DTI Negosyo Center San Andres, San Andres Municipal Police Station at BJMP Odiongan District Jail.
