Matapos mabigo sa tatlong magkakasunod na pagtatangka, pormal nang inaprubahan ng Sangguniang Bayan ng San Fernando ang isang resolusyon na nag-aawtorisa at nagsasa-institusyon ng live streaming ng mga regular session sa opisyal na Facebook page ng konseho.
Naipasa ito sa ginanap na regular session ng Sangguniang Bayan ngayong Lunes, August 3.
Layunin ng resolusyon na mapalakas ang transparency, accountability, citizen engagement, at paglaban sa misinformation sa pamamagitan ng pagbibigay sa publiko ng mas madaling access sa mga talakayan at desisyon ng Sangguniang Bayan.
Ang panukala ay inihain ni Sangguniang Bayan Member Marites Romano Clavel, na nagsabing mahalagang hakbang ang pag-apruba ng resolusyon tungo sa mas bukas at mas transparent na pamamahala.
Ayon kay Clavel, tatlong beses na hindi naaprubahan ang panukala bago ito tuluyang nakalusot sa konseho.
“This resolution was previously denied three (3) times, but with perseverance, constructive dialogue, and our shared commitment to good governance, it has now been approved. May this serve as a reminder that worthwhile initiatives are always worth pursuing,” ani Clavel.
Sa ilalim ng resolusyon, inaasahang maisasahimpapawid sa opisyal na Facebook page ng Sangguniang Bayan ang mga regular na sesyon upang masubaybayan ng mga mamamayan ang mga deliberasyon, panukala, at iba pang mahahalagang usaping tinatalakay ng konseho.
Ayon sa may-akda ng resolusyon, ang inisyatiba ay bahagi ng pagsusulong ng mas bukas at responsableng lokal na pamamahala sa San Fernando.
Discussion about this post