Nanawagan ang Protect Verde Island Passage (Protect VIP) sa pamahalaan na agad magpatupad ng bagong sistemang naaayon sa Konstitusyon para sa monitoring ng commercial fishing matapos ideklarang unconstitutional ng Supreme Court ang Fisheries Administrative Order (FAO) No. 266.
Ayon kay Fr. Edwin Gariguez, lead convenor ng Protect VIP, mahalaga ang Vessel Monitoring System (VMS) bilang mekanismo upang masubaybayan ang galaw ng mga commercial fishing vessel at matukoy ang posibleng pagpasok ng mga ito sa protected o restricted waters.
Ginagamit ang VMS para sa satellite-based tracking ng mga sasakyang pangisda, na nagbibigay sa mga awtoridad ng datos tungkol sa lokasyon at galaw ng mga ito. Makakatulong din umano ito sa pagpapatupad laban sa illegal, unreported and unregulated (IUU) fishing at sa mas maayos na fisheries management.
Nagbabala ang grupo na maaaring lumaki ang panganib sa marine ecosystems at kabuhayan ng mga maliliit na mangingisda kung tuluyang mawawala ang epektibong monitoring sa commercial fishing.
Binigyang-diin din ng Protect VIP na mahalaga ang vessel monitoring sa pagprotekta sa preferential rights ng municipal at small-scale fisherfolk, lalo na’t pinapayagan na ng naunang ruling ng Supreme Court ang commercial fishing sa loob ng 15-kilometer municipal waters.
Ayon sa grupo, nakararanas na ang mga karagatan ng Pilipinas ng matinding pressure dahil sa overfishing, pagkasira ng marine habitats, polusyon at epekto ng climate change. Mas sensitibo umano rito ang Verde Island Passage (VIP) dahil kabilang ito sa pinakamayamang marine biodiversity areas sa mundo.
Sa ruling ng Korte Suprema, ibinasura ang FAO No. 266 dahil hindi umano nito natugunan ang mga constitutional requirements, kabilang ang mga usapin sa proteksyon ng commercially sensitive information at proseso ng pagbuo ng regulasyon.
Nanawagan ang Protect VIP sa Department of Agriculture (DA) at Bureau of Fisheries and Aquatic Resources (BFAR) na makipagtulungan sa mga fisherfolk, scientist, civil society organizations, lokal na pamahalaan at legal experts upang makabuo ng constitutionally sound na monitoring framework.
Iginiit ni Gariguez na dapat mapanatili ang transparency at accountability sa commercial fishing habang pinoprotektahan ang lehitimong business interests.
Para sa grupo, ang pangunahing layunin ng bagong polisiya ay tiyaking napoprotektahan ang maliliit na mangingisda, coastal communities at marine ecosystems, habang natutupad ng pamahalaan ang tungkulin nitong pangalagaan ang yamang-dagat para sa kasalukuyan at susunod na henerasyon.
Discussion about this post