Bumaba ang bilang ng naitatalang road crash incidents sa bayan ng San Andres kumpara sa parehong panahon noong nakaraang taon, ayon sa San Andres Municipal Police Station (MPS).
Sa isinagawang PIA Romblon Information Caravan sa Barangay Mabini noong Agosto 28, sinabi ni Police Major Nanette Pablico, hepe ng San Andres MPS, na lima lamang ang naitalang road crash incidents sa kanilang bayan hanggang Agosto 28 ngayong taon, kumpara sa 19 na naitala sa kaparehong panahon noong nakaraang taon.
Ayon kay Pablico, nakatulong sa pagbaba ng mga insidente ang mas pinaigting na police visibility sa mga pangunahing kalsada sa pamamagitan ng regular na checkpoint at patrol operations.
“Kung mapapansin po ninyo, three times a day na kami sa kalsada. Checkpoint pa lang ‘yun, aside pa sa mga patrolling namin,” ani Pablico.
Idinagdag niya na nakatulong din ang mas maraming motorista na kumukuha ng driver's license at nagpaparehistro ng kanilang mga motorsiklo, bagama't may ilan pa ring hindi sumusunod sa mga batas-trapiko.
Binigyang-diin din ng hepe ng pulisya ang kahalagahan ng pagsusuot ng tamang helmet upang mabawasan ang posibilidad ng malubhang pinsala sakaling magkaroon ng aksidente.
“Malaking tulong din ang pagsusuot ng helmet,” aniya, kasabay ng paalala sa mga motorista na gumamit ng helmet na sumusunod sa mga itinakdang pamantayan sa kaligtasan.
Ayon kay Pablico, nakatulong din sa kampanya sa kaligtasan sa kalsada ang Project Ligtas Kalsada ng Romblon Police Provincial Office, na naglalayong palakasin ang pagpapatupad ng mga batas-trapiko at paigtingin ang kamalayan ng publiko sa responsableng pagmamaneho.
Samantala, sinabi rin niya na lima pang personnel ng San Andres MPS ang inaasahang ma-deputize ng Land Transportation Office (LTO). Sa oras na makumpleto ang proseso, magkakaroon sila ng karagdagang tungkulin sa pagpapatupad ng mga batas at regulasyon sa trapiko.
Hinimok naman ng San Andres MPS ang mga motorista na patuloy na sumunod sa batas-trapiko, tiyaking rehistrado at ligtas ang kanilang mga sasakyan, at isulong ang responsableng pagmamaneho upang higit pang mabawasan ang mga aksidente sa kalsada.
