Nagsagawa nitong August 28 ng Information Caravan ang Philippine Information Agency (PIA) Romblon sa Barangay Mabini, San Andres, Romblon upang ilapit sa mga residente ang mahahalagang impormasyon, programa at serbisyong hatid ng iba't ibang ahensya ng pamahalaan.
Isinagawa ang aktibidad katuwang ang Public Information Office ng Lokal na Pamahalaan ng San Andres, PhilHealth Romblon, SSS Odiongan, TESDA Romblon, DTI Negosyo Center San Andres, San Andres Municipal Police Station, at BJMP Odiongan District Jail.
Sa pamamagitan ng caravan, nabigyan ng pagkakataon ang mga residente na direktang makakuha ng impormasyon at makapagtanong tungkol sa mga programa at serbisyong maaaring mapakinabangan mula sa mga kalahok na ahensya ng pamahalaan.
Tinalakay ng PhilHealth Romblon ang mga programa at serbisyong pangkalusugan, habang nagbigay naman ng impormasyon ang SSS Odiongan tungkol sa mga benepisyo at iba pang serbisyong maaaring ma-access ng mga miyembro.
Nagbahagi rin ang TESDA Romblon ng impormasyon tungkol sa mga programang pang-skills training at iba pang oportunidad para sa mga nais na makakuha ng karagdagang kasanayan. Tinalakay naman ng DTI Negosyo Center San Andres ang mga serbisyong maaaring mapakinabangan ng mga nais magsimula o magpalago ng kanilang negosyo.
Nagbigay rin ng mahahalagang impormasyon ang San Andres Municipal Police Station at BJMP Odiongan District Jail kaugnay ng kani-kanilang programa at mga serbisyong may kinalaman sa kaligtasan, seguridad at iba pang usaping pangkomunidad.
Ayon sa PIA Romblon, layunin ng Information Caravan na mas mapalapit ang mga ahensya ng pamahalaan sa mga mamamayan, lalo na sa mga komunidad, at matiyak na ang tamang impormasyon tungkol sa mga programa at serbisyo ng gobyerno ay direktang naihahatid sa publiko.
Ang aktibidad ay bahagi ng patuloy na pagsisikap ng PIA na palakasin ang government-to-citizen communication at magsilbing tulay sa pagitan ng pamahalaan at mamamayan sa paghahatid ng napapanahon at mahahalagang impormasyon.
