Naglabas si Pangulong Ferdinand R. Marcos Jr. ng kautusan na naglalayong mapalawak ang social protection coverage para sa mga Contract of Service (COS) at Job Order (JO) workers sa pamahalaan.
Sa ilalim ng Administrative Order No. 43, na nilagdaan ng Pangulo noong Hunyo 3, pinadali ang boluntaryong pagkakaltas at paghuhulog ng kontribusyon ng mga COS at JO workers sa Social Security System (SSS), Philippine Health Insurance Corporation (PhilHealth), at Pag-IBIG Fund.
Nakasaad sa kautusan na kailangang may pahintulot muna ng worker bago kaltasan ang kanyang compensation para sa mga naturang kontribusyon.
Saklaw ng AO 43 ang mga departamento, ahensya, bureau, tanggapan at iba pang instrumentalities ng national government, kabilang ang government-owned or -controlled corporations (GOCCs) at state universities and colleges (SUCs) na kumukuha ng serbisyo ng individual COS at JO workers.
Hinikayat din ang mga local government units (LGUs) na sundin ang mga probisyon ng kautusan.
Inaatasan ang mga concerned government agencies na direktang i-remit ang nakaltas na kontribusyon sa SSS, PhilHealth at Pag-IBIG Fund at tiyaking nasa oras ang paghuhulog nito.
Binigyang-diin naman sa kautusan na hindi nito binabago ang umiiral na contractual relationship sa pagitan ng mga government agency at COS o JO workers.
Inatasan ang Department of Budget and Management (DBM), Civil Service Commission (CSC), Commission on Audit (COA), SSS, PhilHealth at Pag-IBIG Fund na maglabas ng mga kinakailangang rules, guidelines at accounting procedures para sa pagpapatupad ng kautusan.
Samantala, nakasaad sa Joint Circular No. 1, s. 2025 ng CSC, COA at DBM na maaaring pagkalooban ng premium na hindi lalampas sa 20 porsiyento ng kanilang compensation ang COS at JO workers upang makatulong sa boluntaryo o self-employed contributions sa mga government-mandated social security programs.
