Nagsagawa ang National Dairy Authority (NDA) ng dalawang araw na orientation hinggil sa Dairy Farming Program para sa mga residente ng Alcantara na interesadong magsimula ng backyard dairy farming noong Agosto 3 at 4.
Tinalakay sa orientation ang mga pangunahing kaalaman sa basic dairy husbandry at forage development bilang paghahanda sa wastong pag-aalaga ng mga gatasang baka. Matapos ang pagsasanay, nagsagawa rin ang NDA ng site visits sa mga aplikanteng nagsumite ng Letter of Intent (LOI) upang suriin ang mga posibleng lokasyon ng proyekto.
Ayon sa NDA, ang orientation ay unang hakbang lamang sa pagpapatupad ng programa. Bago maging kwalipikado sa pagtanggap ng mga gatasang baka, kinakailangang makapagtanim muna ang mga aplikante ng mga forage crops, tulad ng Napier grass, at makapagtayo ng maayos na kulungan. Sasailalim din ang mga ito sa site validation upang matiyak na handa ang kanilang lugar para sa proyekto.
Nakipagpulong din ang NDA team kay Alcantara Mayor Riza Galicia-Pamorada upang talakayin ang layunin ng programa at ang mga benepisyong maibibigay nito sa mga nagnanais pumasok sa dairy farming.
Pinangunahan ni Project Development Officer Harry Salubayba ng NDA ang aktibidad sa pakikipagtulungan ng mga kawani ng Municipal Agriculture Office (MAO).
Ayon sa Lokal na Pamahalaan ng Alcantara, inaasahang makatutulong ang Dairy Farming Program sa pagpapalakas ng kabuhayan ng mga magsasaka, pagpapataas ng lokal na produksyon ng gatas, at pagpapaunlad ng sektor ng agrikultura sa bayan. Nagpasalamat din ang LGU sa NDA sa pagdadala ng programa na magbubukas ng karagdagang oportunidad sa kabuhayan ng mga residente.
