Lalaking wanted sa rape, arestado sa Alcantara

Arestado ang isang 21-anyos na lalaki na nakatala bilang Rank No. 8 Most Wanted Person sa MIMAROPA matapos ang isinagawang manhunt operation ng pinagsanib na puwersa ng Alcantara Municipal Police Station (MPS) at Romblon Provincial Mobile Force Company sa Barangay Camili, Alcantara, Romblon, bandang alas-10:30 ng umaga noong Agosto 5.

Inaresto ang suspek sa bisa ng warrant of arrest na inilabas ni Executive Judge Edwin B. Buffe ng Regional Trial Court, Branch 82 sa Odiongan, Romblon, kaugnay ng kasong rape na may Criminal Case No. OD-3931 na may petsang July 30, 2026. Walang inirekomendang piyansa para sa pansamantalang kalayaan ng akusado.

Pinangunahan ang operasyon ng mga tauhan ng Alcantara MPS sa pamumuno ni Police Captain Von Edades, Officer-in-Charge, sa pakikipag-ugnayan sa mga intelligence operatives ng Romblon Provincial Mobile Force Company.

Matapos ang pag-aresto, ipinaalam sa suspek ang kanyang mga karapatang konstitusyonal at isinailalim siya sa medical examination at dokumentasyon. Kasalukuyan siyang nasa kustodiya ng Alcantara MPS habang hinihintay ang turnover sa hukuman na naglabas ng warrant.

Pinuri naman ni PRO MIMAROPA Regional Director Police Brigadier General Christopher R. Dela Cruz ang mga operatiba sa matagumpay na pagpapatupad ng warrant.

Ayon sa PRO MIMAROPA, bahagi ang operasyon ng pinaigting na kampanya ng Philippine National Police laban sa mga wanted person sa ilalim ng F.I.G.H.T. C.R.I.M.E.S. Framework, partikular ng Hit Targets Strategy, na nakatuon sa epektibong pagpapatupad ng mga warrant of arrest at tuloy-tuloy na manhunt operations sa buong rehiyon.