Ilang kabahayan ang napinsala dahil sa malakas na hangin sa mga bayan ng San Andres at Calatrava, Romblon, ayon sa mga lokal na awtoridad.
Sa Barangay Agpudlos, San Andres, anim na kabahayan ang nasira matapos hagupitin ng malakas na hangin na iniuugnay sa pagdaan ng isang buhawi, ayon sa San Andres Public Information Office (PIO).
Ilan sa mga bahay ang natanggalan ng bubong dahil sa lakas ng hangin.
Samantala, isang bahay naman sa Barangay Balogo, Calatrava ang natanggalan ng bubong at nasira ang ilang kagamitan matapos hagupitin ng malakas na hangin pasado alas-4 ng hapon.
Patuloy namang nagsasagawa ng assessment ang mga lokal na awtoridad upang matukoy ang kabuuang lawak ng pinsala at pangangailangan ng mga pamilyang naapektuhan.
