Halos 11,000 kabahayan sa mga bayan ng Cajidiocan at Magdiwang ang tumanggap ng tig-10 kilo ng bigas sa ilalim ng Local Government Support Fund (LGSF) Rice Assistance Program ng pambansang pamahalaan bilang bahagi ng hakbang ng administrasyon ni Pangulong Ferdinand R. Marcos Jr. upang mapagaan ang epekto ng pagtaas ng presyo ng pagkain at palakasin ang food security.
Sa Cajidiocan, nagsimula ang pamamahagi ng rice assistance sa humigit-kumulang 7,000 kabahayan.
Nagpasalamat si Mayor Marvin Ramos kay Pangulong Marcos sa pagkakasama ng kanilang bayan sa programa at tiniyak ang mabilis na paghahatid ng tulong sa mga benepisyaryo.
“Maraming salamat Pangulong Bongbong Marcos sa programang Rice Subsidy para sa mga mamamayan ng Cajidiocan. Bilang tagapamahala ng gobyerno, sisiguraduhin po natin na mabilis ang aksyon at tugon natin sa gobyerno,” ani Ramos.
Samantala, sinimulan na rin ng Lokal na Pamahalaan ng Magdiwang ang pamamahagi ng tig-10 kilo ng bigas sa tinatayang 3,800 kabahayan sa ilalim ng kaparehong programa.
Ayon kay Mayor Noel Joseph Machon, isinagawa nang sabay-sabay ang distribusyon sa siyam na barangay ng bayan upang mas mapabilis ang paghahatid ng ayuda sa mga kuwalipikadong benepisyaryo.
Sa pagsisimula ng pamamahagi sa Cajidiocan at Magdiwang, umabot na sa 10 sa 17 munisipalidad ng Romblon ang nagpapatupad ng LGSF-funded rice assistance program. Nauna nang nagsagawa ng distribusyon ang mga bayan ng Banton, Calatrava, Concepcion, Looc, Romblon, San Agustin, San Andres, at Santa Fe.
Ang LGSF Rice Assistance Program ay bahagi ng patuloy na food security initiatives ng administrasyon ni Pangulong Marcos, kung saan nagbibigay ang pambansang pamahalaan ng pondo sa mga lokal na pamahalaan upang maipamahagi ang rice assistance sa mga pamilyang higit na nangangailangan.
