Tuloy-tuloy ngayong Lunes ang pamamahagi ng tig-10 kilo ng bigas sa mga residente ng Ferrol, Romblon bilang bahagi ng ikalawang tranche ng rice assistance na pinondohan sa ilalim ng Local Government Support Fund (LGSF) ng pambansang pamahalaan sa administrasyon ni Pangulong Ferdinand R. Marcos Jr.
May kabuuang ₱7 milyon na pondo ang inilaan para sa programa, na target na maabot ang 2,550 pamilya sa buong bayan.
Nauna nang naipamahagi ang unang 10 kilo ng bigas noong nakaraang buwan. Sa kabuuan, 30 kilo ng bigas bawat pamilya ang nakatakdang matanggap sa tatlong tranche, tig-10 kilo sa bawat pamamahagi.
Layunin ng programa na makatulong sa pang-araw-araw na pangangailangan ng mga pamilya at mapalakas ang food security sa komunidad.
Ayon kay Mayor Christian Gervacio, malaking tulong sa mga residente ang rice assistance dahil nakatutulong ito sa kanilang pang-araw-araw na gastusin, lalo na sa pagkain.
Nagpasalamat din ang alkalde sa pambansang pamahalaan sa pagkakaloob ng pondo para sa programa na aniya ay direktang nakatutulong sa mga pamilyang benepisyaryo.
Kaisa ng alkalde sa programa sina Vice Mayor Joenan Sarmiento, kasama ang mga konsehal at mga punong barangay ng bayan.
