Nagkaloob ang Department of Labor and Employment (DOLE) Romblon Provincial Office ng livelihood assistance sa limang magulang ng child laborers mula sa San Agustin, Romblon noong August 11, 2026 sa ilalim ng DOLE Integrated Livelihood Program (DILP).
Kabilang sa ipinagkaloob ang dalawang motorized banca, farming tools at welding set na mapapakinabangan ng mga benepisyaryo mula sa Barangay Carmen, Doña Juana at Binonga-an.
Layunin ng livelihood assistance na mabigyan ang mga benepisyaryong pamilya ng karagdagang pagkakakitaan at mas matatag na pinagkukunan ng kita upang makatulong sa kanilang pang-araw-araw na pangangailangan at masuportahan ang pag-aaral ng kanilang mga anak.
Sa pamamagitan ng DILP, patuloy na nagbibigay ang DOLE ng mga oportunidad sa mga pamilya upang mapalakas ang kanilang kabuhayan at makatulong sa pagpigil sa child labor.
Bahagi ang programa ng mga hakbang ng pamahalaan upang palakasin ang mga pamilya at mabigyan ang mga bata ng mas ligtas at mas magandang kinabukasan.
