Nagkaloob ang Department of Labor and Employment (DOLE) MIMAROPA, sa pamamagitan ng Romblon Provincial Office, ng ₱1.983 milyong halaga ng agricultural machinery at farm implements sa Binonga-an High Value Crops Growers Association.
Pinondohan ang proyekto sa ilalim ng DOLE Integrated Livelihood Program (DILP) upang mapabago ang pamamaraan ng pagsasaka ng samahan sa pamamagitan ng paggamit ng makabagong makinarya na magpapataas ng produktibidad at magpapababa ng pagdepende sa labor-intensive farming.
Kabilang sa ipinagkaloob ang isang 50-horsepower four-wheel drive tractor na may boom sprayer, rotary tillers at disc harrow, dalawang battery-operated knapsack sprayers, at isang 6.5-horsepower gasoline pumpset na may kasamang discharge at suction hoses.
Ayon sa DOLE, inaasahang mapapabilis ng mga kagamitang ito ang paghahanda ng lupa, pagtatanim, at iba pang gawaing pang-agrikultura ng mga miyembro ng BHVCGA. Makatutulong din ito upang mabawasan ang gastos sa produksyon, matugunan ang kakulangan sa manggagawa sa bukid, mapaikli ang oras ng paghahanda ng sakahan, at mapataas ang ani, partikular sa mga high-value crops.
Sinabi rin ng ahensya na bahagi ang DILP ng patuloy nitong pagsuporta sa mga magsasaka sa pamamagitan ng mga sustainable livelihood intervention na nagtataguyod ng entrepreneurship, self-reliance, at inclusive rural development.
Sa pamamagitan ng pagpapalakas sa kakayahan ng mga organisadong samahan ng mga magsasaka at pagpapakilala ng makabagong teknolohiya sa agrikultura, inaasahan ng DOLE na madaragdagan ang kita ng mga benepisyaryo, mapalalakas ang food security, at maisusulong ang pag-unlad ng ekonomiya sa bayan ng San Agustin.
Discussion about this post