Walang kasalukuyang mining o exploration activity sa lugar na malapit sa Mt. Guiting-Guiting Natural Park sa Sibuyan Island, Romblon dahil nananatiling umiiral ang Cease and Desist Order (CDO) laban sa Altai Philippines Mining Corp., ayon sa Department of Environment and Natural Resources (DENR).
Ayon sa ulat ng Philippine News Agency (PNA), sinabi ni Mines and Geosciences Bureau (MGB) MIMAROPA Regional Director Felizardo Gacad Jr. na walang natukoy na mining activity o ground movement sa lugar na sakop ng Altai batay sa monitoring ng ahensya.
“Wala naman mining operation doon because there is an existing cease and desist order that was issued sometime in 2023,” ani Gacad, ayon sa PNA.
Ipinaliwanag ni Gacad na ang Mineral Production Sharing Agreement (MPSA) ng Altai, na inisyu noong 2009, ay nagbigay lamang sa kumpanya ng pahintulot na magsagawa ng exploration sa itinakdang panahon at hindi awtorisasyon para sa commercial mining operations.
Nag-expire noong 2024 ang dalawang taong exploration period ng kumpanya. Tinanggihan naman ng DENR ang kahilingan ng Altai para sa extension, na kalaunan ay pinagtibay ng central office.
Dahil dito, umapela ang kumpanya sa Office of the President noong Nobyembre 18, 2024. Ayon kay Gacad, nakabinbin pa rin ang apela.
“So yun ang status niya so far, wala tayong exploration activity,” sinabi ni Gacad sa PNA.
Nilinaw din ng opisyal na bagama't maaari pa ring makipagkonsultasyon ang kumpanya sa mga lokal na opisyal at komunidad, hindi nangangahulugan ang mga konsultasyong ito na maaari nang magsagawa ng exploration activities sa lugar.
Samantala, unang inaprubahan ng Sangguniang Bayan ng San Fernando noong Hulyo 17 ang isang resolusyon na nag-eendorso sa mining project ng Altai. Gayunman, kasunod ng mga pagtutol sa proyekto, binawi at inurong ng municipal council ang naturang endorsement noong Agosto 3.
Sinabi ni Gacad na hindi pa natatanggap ng DENR ang opisyal na kopya ng pinakahuling resolusyon ng Sangguniang Bayan.
