Tinatayang nasa 200 metric tons ang kabuuang produksyon ng mais sa Romblon batay sa mahigit 50 ektaryang taniman at inaasahang ani na humigit-kumulang 4 metric tons per hectare, ayon sa Office of the Provincial Agriculturist (OPAg).
Ayon kay Engr Wally Boy Falcutila ng OPAg, dumarami na ang nagtatanim ng yellow corn sa lalawigan, habang nadaragdagan din ang mga bumibili ng ani mula sa mga lokal na magsasaka. Anila, indikasyon ito ng lumalawak na merkado para sa mais sa Romblon.
Kamakailan, nagsagawa ang OPAg ng field monitoring sa mga taniman ng yellow corn sa mga bayan ng San Andres at Odiongan upang masuri ang kalagayan ng mga pananim at matukoy ang mga pangangailangan ng mga magsasaka.
Kabilang sa mga binisitang lugar ang Barangay Victoria, Tan-agan, at Matutuna sa San Andres, gayundin ang Barangay Pato-o, Progreso Este, at Rizal sa Odiongan.
Nakipag-ugnayan din ang mga kawani ng OPAg sa mga magsasaka upang alamin ang kanilang mga karanasan at mga hamon sa produksyon, habang nagbigay ng mga teknikal na rekomendasyon kaugnay ng wastong pangangalaga sa mga pananim.
Sinabi pa ni Falcutila na kabilang sa mga intervention na naipagkaloob sa mga yellow corn farmers, sa pamamagitan ng suporta ng Department of Agriculture–MIMAROPA, ang pamamahagi ng libreng dekalidad na binhi at organic fertilizer.
Ayon pa sa kanya, isinasagawa ang regular na field monitoring upang makalikom ng aktuwal na datos na magsisilbing batayan sa pagpaplano at pagpapatupad ng mga programa para sa pagpapaunlad ng industriya ng mais sa Romblon.
Discussion about this post