Kasalukuyang nasa 131 ang jail population ng Odiongan District Jail, kabilang ang isang babaeng person deprived of liberty (PDL), ayon kay Acting District Jail Warden Senior Inspector Rowena Olivar.
Sa ginanap na PIA Romblon Information Caravan sa Barangay Mabini, San Andres, sinabi ni Olivar na bumaba ang bilang ng mga PDL kumpara sa 149 na naitala noong Marso.
Bukod sa pamamahala sa mga PDL, sinabi rin ni Olivar na nagpapatuloy ang BJMP Odiongan District Jail sa pagsasagawa ng mga community service at pakikipag-ugnayan sa mga komunidad.
Ayon sa kanya, mahalaga ang pakikipagtulungan ng komunidad sa paghahanda ng mga PDL sa kanilang pagbabalik sa lipunan sa oras na sila ay lumaya.
“Kung bakit kami lumalapit sa community, kasi ito talaga ang partners namin para kung sakaling lumaya man ang mga PDL na nandoon sa amin, may maayos na komunidad silang babalikan,” ani Olivar.
Samantala, ibinahagi rin niya na nagpapatuloy ang recruitment ng BJMP at hinikayat ang mga kwalipikadong indibidwal na interesadong pumasok sa serbisyo na makipag-ugnayan sa kanilang tanggapan para sa karagdagang impormasyon.
Ang BJMP Odiongan District Jail ay kabilang sa mga ahensyang nakilahok sa PIA Romblon Information Caravan na naglalayong mailapit sa mga residente ng San Andres ang mga programa at serbisyo ng pamahalaan.
