Namahagi ang Philippine Coconut Authority (PCA)-Romblon ng kabuuang ₱1,257,250 na insentibo sa mga magniniyog sa bayan ng San Andres bilang bahagi ng Massive Coconut Planting Program (MCPP) ng pamahalaan.
Ipinagkaloob ang insentibo sa mga benepisyaryong magsasaka na matagumpay na nakapagtanim ng kabuuang 35,750 coconut seednuts sa ilalim ng Phase I ng MCPP-Participantory Coconut Planting Project (PCPP) Option II.
Sa mga barangay ng Marigondon Sur at Marigondon Norte, umabot sa ₱553,035 ang ipinamahagi sa mga magsasakang nakapagtanim ng 15,801 coconut seednuts.
Samantala, tumanggap naman ng ₱422,940 ang mga benepisyaryo mula sa mga barangay ng Agpudlos, Linawan, at Calunacon matapos makapagtanim ng 12,084 coconut seednuts.
Sa Barangay Victoria, isa pang ₱275,275 ang ipinamahagi sa mga magniniyog na nakapagtanim ng 7,865 coconut seednuts sa ilalim ng parehong programa.
Layunin ng incentive program na hikayatin ang mga magniniyog na lumahok sa rehabilitasyon at pagpapalawak ng mga taniman ng niyog habang nagbibigay ng pinansyal na suporta sa bawat yugto ng pagtatatag ng mga punla.
Ayon kay Edidicacion Factor, isa sa mga benepisyaryo mula sa Barangay Victoria, malaking tulong ang programa sa mga magsasaka dahil nagbibigay ito ng karagdagang kita para sa pang-araw-araw na gastusin at pag-aaral ng kanilang mga anak.
“Malaking tulong po ang programa sa mga magsasaka dahil nagbigay ito ng dagdag kita para sa pang-araw-araw na pangangailangan at edukasyon ng mga anak. Nakakatulong din ito sa industriya ng niyog dahil sa mas maraming produksyon. Sana ay magpatuloy ang programa upang lalo pang mapalakas ang produksyon ng niyog,” ani Factor.
Target ng MCPP na makapagtanim ng hindi bababa sa 100 milyong punla ng niyog pagsapit ng 2028 upang mapalitan ang mga matatanda, hindi na produktibo, at mga punong niyog na nasira ng kalamidad, gayundin ang pagpapalawak ng mga taniman ng niyog sa bansa.
Patuloy namang ipatutupad ng PCA-Romblon ang mga programang naglalayong suportahan ang mga magniniyog at isulong ang napapanatiling pag-unlad ng industriya ng niyog sa lalawigan.
