Muling nabigo ang panukalang resolusyon na nagsusulong ng live streaming ng regular sessions ng Sangguniang Bayan ng San Fernando matapos itong hindi maaprubahan sa ikatlong pagkakataon sa isinagawang regular session noong July 31.
Ayon kay Sangguniang Bayan Member Marites R. Clavel, naghain siya ng mosyon upang maisalang sa deliberasyon ang kanyang panukalang resolusyon na naglalayong gawing regular ang pag-live stream ng mga sesyon sa opisyal na Facebook page ng Sangguniang Bayan upang isulong ang transparency, accountability, citizen engagement, at labanan ang misinformation.
Sa isinagawang botohan, apat na miyembro ang bumoto pabor sa panukala habang apat din ang bumoto laban. Isang miyembro ang nag-abstain at isa pa ang wala sa sesyon.
Dahil sa pagkakatabla ng boto, nagsagawa ng tie-breaking vote ang Presiding Officer, alinsunod sa umiiral na parliamentary rules, at bumoto laban sa panukala, dahilan upang hindi ito maaprubahan.
Ayon kay Clavel, ito na ang ikatlong pagkakataon na hindi naaprubahan ang kanyang panukalang resolusyon.
“Tatlong beses. Tatlong beses ding hindi nabigyan ng pag-apruba ang aking panukalang i-live stream ang Regular Sessions ng Sangguniang Bayan,” ani Clavel.
Idinagdag niya na sa panahon ng digital governance at open government, mahalagang mapalawak ang access ng publiko sa mga deliberasyon ng Sangguniang Bayan sa pamamagitan ng live streaming ng mga regular na sesyon.
Discussion about this post