Naghain ng resolusyon ang mga Indigenous Peoples Mandatory Representatives (IPMRs) at mga lider ng katutubong komunidad sa Sibuyan Island na humihiling ng kaukulang aksyon laban kay San Fernando IPMR Celedonio Tamayo matapos umano itong lumagda sa isang resolusyon na may kaugnayan sa pagmimina nang walang isinagawang konsultasyon sa komunidad.
Sa panayam ng Romblon News Network kay Provincial IPMR Irene Roa, sinabi nitong ikinadismaya ng mga katutubong lider ang naging hakbang ni Tamayo dahil hindi umano nito kinausap ang mga elders at iba pang miyembro ng komunidad bago pumirma sa naturang resolusyon.
“Pang-sarili niyang interes. Kasi kung inisip niya ang pangkalahatan, hindi niya nagawa ‘yun. Kasi pinili siya ng mga katutubo, pinagkatiwalaan siya, tapos ganoon. Hindi man lang siya nagkonsulta, hindi man lang niya tinanong ang mga matatanda,” ani Roa.
Nabanggit din ni IPMR Roa na ang mga IPMR ay dapat laging kumonsulta sa komunidad at sa IPs sa lahat ng programa, aktibidad, at mga bagay na maaaring makaapekto sa mga karapatan, interes, at kapakanan ng apektadong pamayanan, alinsunod sa Section 7 ng NCIP Administrative Order No. 1, Series of 2021.
Sinabi rin niya na, batay sa kanilang pananaw, natapos na ang holdover authority ni Tamayo noong Hulyo 16 at dapat nang maisagawa ang proseso ng pagpili ng bagong IPMR alinsunod sa National Guidelines (NCIP Administrative Order No. 1, Series of 2021).
Sa kasalukuyan, hinihintay ng grupo ang magiging tugon ng Sangguniang Bayan ng San Fernando sa kanilang isinumiteng resolusyon.
Hanggang sa oras ng paglalathala, wala pang opisyal na pahayag si Celedonio Tamayo kaugnay ng panawagan ng mga katutubong lider.
