Kinilala ng Department of Health (DOH)-MIMAROPA ang Municipality of Odiongan bilang huwarang lokal na pamahalaan sa pagpapatupad ng mga community-based nutrition programs, kasabay ng pag-uulat ng mga positibong pagbabago at mga hamon sa nutrisyon sa lalawigan ng Romblon.
Sa 52nd National Nutrition Month Regional Launching na ginanap sa Romblon State University noong July 7, inihatid ni Provincial Health Officer Dr. Winston Palasi ang mensahe ni DOH MIMAROPA Regional Director Dr. Rodolfo Antonio M. Albornoz, kung saan pinuri ang Odiongan sa pagsasama ng mga nutrition program sa lokal na pamamahala sa pamamagitan ng mga polisiya, pondo, at aktibong partisipasyon ng komunidad.
Ayon sa DOH, naipatupad ng Odiongan ang iba't ibang programa tulad ng First 1,000 Days Program, Pabasa sa Nutrisyon, Buntis Congress, at iba pang community-based interventions na nakatuon sa pagpapabuti ng kalusugan ng mga buntis at mga bata.
Pinalakas din ng munisipyo ang suporta sa mga frontline nutrition workers at hinikayat ang mga pamilya na magtanim ng sariling gulay sa pamamagitan ng pamamahagi ng vegetable seeds at gardening tools upang mapabuti ang household food production at nutrisyon.
Samantala, inilatag din ng DOH ang resulta ng Operation Timbang Plus 2025, na nagpapakita ng pagbaba ng stunting sa mga batang edad 0 hanggang 59 buwan sa Romblon mula 9.7 porsyento noong 2024 tungo sa 8.5 porsyento.
Nanatili rin sa 2.5 porsyento ang prevalence ng moderately at severely wasted children sa lalawigan, mas mababa kaysa regional average na 3.0 porsyento, bagama't bahagyang mas mataas ito kumpara sa 2.23 porsyento noong nakaraang taon.
Gayunman, sinabi ng DOH na naitala ng Romblon ang pinakamataas na kaso ng overweight at obesity sa mga batang edad 0 hanggang 59 buwan sa buong MIMAROPA, na may 3.2 porsyento, mas mataas kaysa regional average na 2.3 porsyento.
Binigyang-diin ng ahensya na mahalaga ang patuloy na pagpapatupad ng mga nutrition intervention, lalo na sa unang 1,000 araw ng buhay ng isang bata, na itinuturing na pinakamahalagang yugto para sa tamang paglaki at pag-unlad.
Ipinaalala rin ng DOH na ang tema ng 52nd National Nutrition Month, “Nutrisyon at Kalikasan, Ating Pangalagaan!”, ay nagbibigay-diin sa ugnayan ng pangangalaga sa kalikasan, seguridad sa pagkain, at wastong nutrisyon.
Muling pinagtibay ng DOH ang pangako nitong ipagpapatuloy ang pakikipagtulungan sa mga lokal na pamahalaan at iba pang partner agencies upang higit pang mapalakas ang mga programa sa nutrisyon at makabuo ng mas malusog at mas matatag na mga komunidad sa MIMAROPA.
