Ligtas na ang apat na tripulante ng isang pribadong yate na nasunog sa karagatang sakop ng Barangay Mabini, San Fernando, Romblon nitong Linggo ng hapon.
Ayon sa paunang ulat na ibinahagi ni Romblon Governor Trina Firmalo-Fabic, ang nasunog na sasakyang pandagat ay isang pribadong yate na “My Jason” mula sa Subic na may apat na tripulante.
Batay sa naunang impormasyon mula sa mga source ng Romblon News Network (RNN) sa lugar, unang nasagip ng mga lokal na mangingisda ang apat na tripulante bago sila sinalubong ng mga rescue team na nagsasagawa ng search and rescue operations.
Kinumpirma ni Fabic na ligtas na ang lahat ng apat na tripulante. Patuloy namang nakikipag-ugnayan ang Philippine Coast Guard (PCG) sa mga tripulante upang makakuha ng karagdagang impormasyon habang mino-monitor ang kalagayan ng nasusunog na yate.
Nagpasalamat din ang gobernador sa mga tumulong sa isinagawang rescue operation, kabilang ang Lokal na Pamahalaan ng San Fernando, Lokal na Pamahalaan ng Cajidiocan, Philippine Coast Guard–High Speed Response Boat (HSRB), Provincial Government of Romblon–Provincial Disaster Risk Reduction and Management Office (PDRRMO), mga uniformed personnel, at mga lokal na mangingisda.
Sa kasalukuyan, wala pang inilalabas na opisyal na ulat ang mga awtoridad hinggil sa sanhi ng sunog sa yate. Patuloy ang imbestigasyon at pagkalap ng karagdagang detalye ng Philippine Coast Guard.
