Inilahad ng Tablas Island Electric Cooperative (TIELCO) ang mga pangunahing datos sa kanilang operasyon para sa taong 2025 sa ginanap na ika-40 Annual General Membership Assembly (AGMA), kung saan binigyang-diin ang paglago ng koneksyon, rehabilitasyon ng linya, at patuloy na pagpapalawak ng serbisyo ng kuryente sa Tablas Island.
Batay sa ulat, umabot sa 51,910 ang kabuuang bilang ng mga miyembro ng kooperatiba pagsapit ng Disyembre 2025, na may karagdagang 1,116 bagong koneksyon kumpara sa nakaraang taon. Naitala rin ang kabuuang 54,852 na konektadong kabahayan sa nasabing panahon.
Sa usapin ng elektripikasyon, nanatiling mataas ang coverage ng TIELCO sa iba’t ibang bayan sa isla, na may kabuuang 97.60 porsyentong household connection accomplishment batay sa datos ng 2025.
Ipinakita rin sa ulat ang mga isinagawang proyekto sa linya ng kuryente, kabilang ang pagpapalawak at rehabilitasyon ng distribution lines. Ayon sa datos, umabot sa mahigit 38 kilometro ng linya ang na-rehabilitate noong 2025, kabilang ang mga apektado ng kalamidad gaya ng bagyo, habang 45.4 kilometro naman ang nalinis o na-clear na linya upang matiyak ang maayos na daloy ng kuryente.
Sa bahagi ng imprastraktura, naitala ang kabuuang 1,605 transformers na naka-install sa iba’t ibang feeder lines, na may kabuuang kapasidad na higit 41,000 kVA.
Samantala, umabot sa 197.426 kilometro ang kabuuang haba ng 3-phase lines, habang 451.689 kilometro naman ang kabuuang distribution line system ng kooperatiba.
Sa financial report, ipinakita na nananatiling pinakamalaking bahagi ng gastusin ng TIELCO ang cost of power na umaabot sa mahigit 82 porsyento ng kabuuang expenditures. Para sa taong 2025, umabot sa ₱633.12 milyon ang kabuuang gastusin ng kooperatiba, mas mataas kumpara sa ₱607.91 milyon noong 2024.
Kabilang din sa mga tinalakay ang system loss rate na nanatili sa single-digit level sa buong taon, pati na ang peak load demand na nagpakita ng pagbabago buwan-buwan.
Ipinakita rin sa ulat ang mga isinagawang information at education campaigns ng kooperatiba, gayundin ang pagtugon sa mga reklamo ng konsyumer bilang bahagi ng pagpapabuti ng serbisyo.
Sa kabuuan, binigyang-diin ng TIELCO na patuloy nitong pinapalakas ang mga programa sa elektripikasyon at imprastraktura upang matiyak ang mas maaasahan at tuloy-tuloy na suplay ng kuryente sa mga mamamayan ng Tablas Island.
Discussion about this post