Tatlong engineering graduates ng Romblon State University (RSU) ang nakatanggap ng tulong pinansyal para sa kanilang board exam review sa ilalim ng partnership ng unibersidad at Romblon News Network (RNN).
Pormal na nilagdaan ng dalawang panig ang Memorandum of Agreement (MOA) para sa programa ng RNN na “Together We Thrive” na ginanap sa RSU Administration Building, na naglalayong suportahan ang mga nagtapos ng Agricultural and Biosystems Engineering (ABE) sa kanilang paghahanda sa licensure examination.
Agad ding ipinagkaloob ang financial assistance sa tatlong benepisyaryo na sina John Lloyd Manalo, Sophia Allison Rodeo, at Rosselle Divino, kung saan bawat isa ay tumanggap ng ₱15,000. Ang nasabing halaga ay inilaan para sa review center fee na ₱12,500 at ₱2,500 para sa review materials.
Ayon kay Paul Jaysent F. Fos, founder ng RNN, layunin ng programa na makatulong sa mga bagong graduate na makapaghanda nang maayos para sa board exam.
“Naniniwala kami na ang pagbibigay-suporta sa edukasyon ay isa sa pinakamahalagang paraan upang makapag-ambag sa pag-unlad ng komunidad. Sa simpleng tulong na ito, umaasa kaming mas maraming kabataang Romblomanon ang makakamit ang kanilang propesyonal na pangarap,” sinabi ni Fos sa isang panayam.
Dumalo rin sa aktibidad ang mga opisyal ng unibersidad kabilang sina Vice President for Administration and Finance Dr. Tomas T. Faminial, na kumatawan kay University President Dr. Merian P. Catajay-Mani, gayundin sina CARES Director Dr. Sherryl M. Fetalvero, Alumni Relations Head Anthony C. Sevilla, at ABE Department Chair Engr. Elbert M. Garcia.
Ayon sa RSU, patuloy nitong imo-monitor ang progreso ng mga benepisyaryo habang naghahanda sila para sa Agricultural and Biosystems Engineering Licensure Examination.
Inaasahang magsisilbing tulay ang naturang partnership upang mas maraming graduates ang matulungan sa kanilang propesyonal na landas.
