Tiniyak ng Department of Trade and Industry (DTI) MIMAROPA na nananatiling matatag ang presyo at sapat ang suplay ng mga pangunahing bilihin sa rehiyon sa kabila ng pagtaas ng presyo ng langis.
Sa panayam sa programang “Arangkada MIMAROPA” ng Philippine Information Agency at Radyo Pilipinas-Palawan noong Abril 15, sinabi ni MIMAROPA Senior Trade-Industry Development Specialist Patricia Joy Zotomayor na pinaigting ng ahensya ang monitoring at enforcement sa mga establisimyento.
Aniya, regular na nakikipag-ugnayan ang DTI sa Local Price Coordinating Council at mga retailer, habang nakapaskil ang Suggested Retail Price (SRP) sa mga pangunahing supermarket at makikita rin sa website at social media ng ahensya.
Ayon sa DTI, kabilang sa mga basic necessities ang canned sardines, gatas, kape, noodles, tinapay, asin, sabon, kandila, at mga condiments tulad ng suka, toyo, at patis. Isinasagawa ang lingguhang price monitoring ng DTI habang buwanang inspeksyon naman ang ginagawa ng mga lokal na pamahalaan.
Batay sa pinakahuling monitoring, nananatiling generally stable ang presyo ng karamihan sa mga pangunahing bilihin sa rehiyon, bagamat may ilang produkto na lumalagpas sa SRP. Nilinaw ng ahensya na dumaraan sa beripikasyon ang mga price deviation upang matiyak kung may sapat na batayan ang pagtaas ng presyo.
Wala ring ipinatupad na price freeze sa kabila ng oil price hike dahil sapat ang suplay ng mga bilihin at walang indikasyon ng panic buying sa rehiyon.
Patuloy ding binabantayan ng DTI ang mga pagtaas ng presyo, lalo na kung lalagpas sa 10 porsyento, na maaaring magresulta sa pagpapadala ng letter of inquiry bilang bahagi ng kampanya laban sa profiteering.
Hinimok ng ahensya ang mga negosyo na tiyaking may sapat na permit at sumusunod sa mga regulasyon, habang pinapayuhan ang publiko na ireport ang anumang reklamo sa mga tanggapan ng DTI at Negosyo Centers sa kanilang lugar.
Samantala, nagpapatuloy ang pakikipagtulungan ng DTI sa mga pangunahing retailer para sa Diskwento Caravan upang maihatid ang mas murang bilihin sa iba’t ibang komunidad sa MIMAROPA.
