Nanawagan ang Philippine Rural Electric Cooperatives Association, Inc. sa mga mambabatas ng House of Representatives of the Philippines at Senate of the Philippines, gayundin sa pambansang pamahalaan, na ilaan na lamang sa national budget ang subsidiya para sa Lifeline Rate sa halip na ipasa ito sa ibang konsyumer.
Ang Lifeline Rate ay isang mekanismo ng subsidiya na nakapaloob sa Republic Act No. 9136 o EPIRA, na nagbibigay ng diskuwento sa singil sa kuryente para sa low-income households at marginalized sectors.
Sa kasalukuyang sistema, ipinatutupad ang subsidiya sa pamamagitan ng cross-subsidy kung saan ang ibang konsyumer ang sumasalo sa bahagi ng diskwento. Kabilang dito ang itinakdang ₱0.01/kWh rate at konsumo na 0–50 kWh na may 100 porsyentong diskwento para sa mga kwalipikadong benepisyaryo, kabilang ang mga miyembro ng Pantawid Pamilyang Pilipino Program (4Ps).
Ayon sa PHILRECA, bagama’t kinikilala nila ang layunin ng Lifeline Rate na makatulong sa mahihirap na sektor, kinakailangan umanong maghanap ng alternatibong mekanismo upang hindi na madagdagan ang pasanin ng ibang Pilipino.
Ipinunto ng grupo na sa gitna ng krisis sa enerhiya at patuloy na pagtaas ng presyo ng kuryente, mahalagang suriin ang mga umiiral na polisiya upang maprotektahan ang kapakanan ng mahigit 17 milyong member-consumer-owners (MCOs) sa buong bansa.
Iminumungkahi ng PHILRECA na direktang sagutin ng pamahalaan ang Lifeline Subsidy sa pamamagitan ng sapat na alokasyon sa pambansang badyet, sa halip na ipasa ito sa mga konsyumer ng kuryente.
Nanindigan ang samahan na ang mga programang panlipunan ay nararapat pondohan ng gobyerno upang matiyak ang patas na implementasyon at hindi madagdagan ang gastusin ng publiko.
Dagdag pa ng PHILRECA, nananatili silang bukas sa pakikipagtulungan sa iba’t ibang sektor at ahensya upang makabuo ng pangmatagalang solusyon para sa kapakanan ng mga konsyumer at katatagan ng sektor ng electric cooperatives sa bansa.
Discussion about this post