Dinala ng Social Security System (SSS) Odiongan Branch ang kanilang E-Wheels sa Sibuyan Island upang mas mapadali at mailapit ang mga transaksyon ng mga miyembro ng SSS sa lalawigan ng Romblon.
Sa isinagawang mobile service, mahigit 300 miyembro ang natulungan sa iba’t ibang transaksyon tulad ng pagkuha ng Social Security (SS) number, pagbabago ng member data, pagpaparehistro sa My.SSS portal, pag-verify ng member records, at pagbuo ng Payment Reference Number (PRN) para sa hulog at pagbabayad ng loan.
Ayon kay SSS Odiongan Branch Head Tiffany Lobo, layunin ng E-Wheels na maabot ang mga komunidad na malalayo sa sentro ng bayan upang mabigyan ng mas mabilis at ligtas na access sa mga serbisyo ng SSS.
Ipinaliwanag ni Lobo na ang programa ay pagkakataon din upang maipaliwanag sa mga miyembro at stakeholders ang mga programa at benepisyo na maaaring makuha mula sa SSS.
Bukod dito, tinuruan din ang mga miyembro kung paano gamitin ang My.SSS portal at MySSS Mobile App upang makapagsagawa ng kanilang mga transaksyon online bilang alternatibong paraan sa pagpunta sa tanggapan ng SSS.
Samantala, nakatakda ring dalhin ng SSS Odiongan ang E-Wheels sa iba pang bahagi ng Romblon, partikular sa mga barangay na malalayo sa sentro ng bayan, upang mas marami pang Romblomanon ang mapaglingkuran.
