Nag-utos si Pangulong Ferdinand “Bongbong” Marcos Jr. ng pansamantalang pagpapatupad ng apat na araw na workweek sa ilang tanggapan ng pamahalaan bilang bahagi ng hakbang ng administrasyon upang makatipid sa enerhiya at mabawasan ang paggamit ng fuel sa gitna ng tumataas na presyo ng langis sa pandaigdigang merkado.
Sa mensahe ng Pangulo sa bansa nitong Biyernes, sinabi niyang magsisimula ang pagpapatupad ng naturang polisiya sa Lunes, Marso 9, at sasaklaw sa piling mga tanggapan sa ilalim ng ehekutibong sangay ng pamahalaan.
Ayon kay Marcos, layunin ng hakbang na mabawasan ang konsumo ng enerhiya ng pamahalaan habang patuloy na nararamdaman ang epekto ng krisis sa Gitnang Silangan na nagdulot ng pagtaas ng presyo ng langis sa mundo.
Kasunod ng anunsyo ng Pangulo, naglabas ang Malacañang ng Memorandum Circular No. 114 na naglalaman ng mga detalye ng implementasyon ng direktiba.
Nakasaad sa memorandum na saklaw ng polisiya ang mga national government agencies, government-owned and controlled corporations (GOCCs), mga local government unit (LGU), constitutional bodies, state universities and colleges, at iba pang instrumentalidad ng pamahalaan.
Gayunman, nilinaw ng Pangulo na magpapatuloy ang normal na operasyon ng mga ahensyang nagbibigay ng essential at frontline services, kabilang ang mga tanggapan para sa serbisyong pangkalusugan, seguridad publiko, at emergency response tulad ng pulisya at mga bumbero.
Kasabay ng pagpapatupad ng four-day workweek, inatasan din ng Pangulo ang mga ahensya ng pamahalaan na bawasan ng 10 hanggang 20 porsiyento ang kanilang konsumo sa kuryente at fuel.
Sa ilalim ng memorandum, dapat panatilihin sa 24 degrees Celsius ang temperature ng air-conditioning sa mga tanggapan, patayin ang mga ilaw at elektronikong kagamitan na hindi ginagamit lalo na tuwing lunch break at pagkatapos ng oras ng trabaho, at ilagay sa sleep mode ang mga office equipment kapag hindi ginagamit.
Ipinag-utos din ng Pangulo ang pansamantalang suspensyon ng mga hindi mahalagang biyahe at aktibidad ng pamahalaan tulad ng study tours, team-building activities, at ilang meeting na maaari namang isagawa online.
Bukod dito, inihayag din ng Malacañang na pinag-aaralan ng pamahalaan ang iba pang hakbang upang maibsan ang epekto ng inaasahang pagtaas ng presyo ng langis, kabilang ang posibleng pag-adjust sa buwis sa petroleum products at pagbibigay ng fuel subsidies.
