Ibinasura ng Supreme Court of the Philippines ang petisyon para sa Writ of Kalikasan na inihain laban sa Altai Philippines Mining Corp. at ilang ahensya ng pamahalaan kaugnay ng pagmimina sa San Fernando, Romblon.
Sa 27-pahinang desisyon na isinulat ni Associate Justice Ramon Paul L. Hernando at inilabas noong Pebrero 23, sinabi ng Korte Suprema en banc na hindi natugunan ng mga petitioner ang mga prerequisites upang maibigay ang naturang writ.
Ayon sa hukuman, hindi naipakita na ang sinasabing pinsala sa kalikasan ay makaaapekto sa “two or more cities or provinces,” na kinakailangan sa ilalim ng mga umiiral na tuntunin.
Nag-ugat ang kaso sa nickel ore exploration ng kumpanya at tangkang pag-export ng 50,000 wet metric tons ng ore mula sa kanilang lugar ng operasyon sa San Fernando. Noong unang bahagi ng 2023, nagbarikada ang ilang residente sa pantalan ng kumpanya dahil sa alegasyon ng ilegal na pagmimina at posibleng “unquantifiable loss of natural heritage.”
Gayunman, sinabi ng Korte Suprema na ang lugar ng pagmimina ay nasa loob lamang ng munisipalidad ng San Fernando o ng lalawigan ng Romblon. Nabanggit din sa desisyon na napaso na noong unang bahagi ng 2023 ang ore transport permit at mineral ore export permit ng kumpanya. Dahil dito, itinuring na wala nang isyung dapat pagpasiyahan ang petisyon.
Tinukoy rin ng hukuman na may inilabas na joint order ang Department of Environment and Natural Resources at Mines and Geosciences Bureau na nag-aatas sa kumpanya na itigil ang pagtatayo ng causeway.
“Nonetheless, petitioners failed to show the environmental damage and its extent that would warrant the issuance of a Writ of Kalikasan,” ayon sa desisyon ng korte.
“This Court has consistently held that a Writ of Kalikasan will not be issued as a mere substitute to legal, administrative, or political remedies that may be available to parties,” dagdag pa nag korte.
Binanggit din ng hukuman na walang sapat na ebidensya upang patunayan ang mga alegasyon hinggil sa “potential for liquefaction” ng nickel ore at sa banta umano sa mga endemic species sa lugar.
“This does not mean, however, that we condone the environmental issues hounding San Fernando, Sibuyan Island, Romblon,” paglilinaw ng korte.
Sa parehong desisyon, sinabi ng Korte Suprema na hindi gumawa ng forum shopping ang mga residente kahit sabay silang humingi ng tulong sa DENR at MGB, na taliwas sa naunang naging pasya ng Court of Appeals.
Sa hiwalay na opinyon, sinabi ni Senior Associate Justice Marvic M.V.F. Leonen na may kakulangan sa kasalukuyang mga tuntunin, partikular sa tinatawag na “magnitude requirement.” Ayon sa kanya, sa kasalukuyang pagkakasulat ng patakaran, ang maliliit na isla na binubuo lamang ng mga barangay o munisipalidad ay maaaring hindi makapaghain ng petisyon para sa Writ of Kalikasan kahit may seryosong epekto sa kanilang kapaligiran.
Iminungkahi niya ang isang “ecosystem approach” kung saan maaaring isaalang-alang ang epekto sa isang natatanging ecosystem kahit nasa loob lamang ng isang lalawigan, basta’t ito ay “sufficiently grave and wide-reaching.”
Samantala, sa kanyang hiwalay na opinyon, binigyang-diin ni Associate Justice Rodil V. Zalameda ang kahalagahan ng maingat na pagsusuri sa ebidensyang siyentipiko sa mga kasong may kinalaman sa kalikasan.
