Hinihikayat ng Romblon Provincial Health Office (PHO) ang publiko na gamitin ang mga libreng dental services na inaalok ng mga ospital at Rural Health Centers sa buong Romblon upang mapanatili ang kalinisan ng kanilang ngipin at maiwasan ang pagkasira nito.
Ayon kay Dr. Renato Menrige Jr. ng PHO, ang mga ospital na may dental clinic ay kabilang ang Romblon Provincial Hospital, Romblon District Hospital, at Tablas Island District Hospital.
Nag-aalok ang mga ospital ng mga serbisyong tulad ng dental consultation, tooth extraction, dental cleaning, dental filling, at ilang mga piling procedures na mayroong mga kinakailangang kagamitan.
Bagamat hindi pa accredited ng PhilHealth ang mga serbisyongito sa mga nasabing ospital, siniguro ng PHO na makikinabang pa rin ang mga residente sa libreng mga serbisyong ito sa pamamagitan ng pondo mula sa pamahalaang panlalawigan.
Bukod dito, may mga dental clinic din ang mga health centers sa mga bayan ng Odiongan, San Fernando, at Looc na nag-aalok ng libreng dental services sa kanilang mga nasasakupan.
Ang kampanyang ito ay bahagi ng selebrasyon ng Dental Health Month ngayong Pebrero, na layuning magbigay-pansin sa kahalagahan ng wastong pangangalaga sa kalusugan ng ngipin.
