Patay ang isang 20 anyos na lalaki matapos maaksidente sa kahabaan ng national road sa Barangay Linawan, San Andres, Romblon noong gabi ng Pebrero 25.
Kinilala ang rider sa alyas na Ren. Ayon sa paunang impormasyon, binabagtas nito ang national road patungong Barangay Agpudlos nang mawalan ng kontrol sa minamaneho nitong motorsiklo.
Sa imbestigasyon, lumabas na nakainom umano ng alak ang rider bago ang insidente.
Nagpatuloy ang motorsiklo hanggang sa lumagpas sa kalsada dahilan upang tumilapon ang rider at angkas nitong menor de edad.
Isinugod ang rider sa Romblon Provincial Hospital ngunit idineklara itong dead on arrival.
Samantala, nagtamo ng mga sugat sa iba’t ibang bahagi ng katawan ang angkas at kasalukuyang nagpapagaling sa San Andres Municipal Hospital.
Patuloy ang imbestigasyon ng mga awtoridad sa insidente.
