Iniutos ni Pangulong Ferdinand R. Marcos Jr. nitong Lunes ang mahigpit na pagpapatupad ng probisyon sa 2026 General Appropriations Act (GAA) na nagbabawal sa pakikilahok ng mga politiko sa pamamahagi ng cash at iba pang tulong-pinansyal, upang matiyak na ang bawat piso ay direktang mapupunta sa mga tunay na benepisyaryo at maiwasan ang patronage.
Sa seremonya ng paglagda sa Malacañan Palace, binigyang-diin ni Pangulong Marcos na ang PhP6.793 trilyong pambansang badyet para sa 2026 ay dapat gamitin lamang sa paglilingkod sa sambayanang Pilipino at hindi kailanman para sa partidista o pampulitikang impluwensya.
“We will strictly implement the provision on the ‘Prohibition on Political Involvement in the Distribution of Cash and Other Forms of Financial Assistance,” sinabi ng Punong Ehekutibo.
“Politicians shall be barred from the distribution of any financial aid and we shall ensure that the support reaches the intended beneficiaries without patronage,” pahayag ng Pangulo.
“Walang bawas, walang kulang,” diin ni Pangulong Marcos, na iginiit na ang mga programang pantulong ay dapat ipatupad sa pamamagitan ng wastong pamamaraan ng pamahalaan at maprotektahan laban sa patronage politics.
Ang pamahalaan ay namamahagi ng cash aid at iba pang anyo ng tulong-pinansyal, kabilang ang Assistance to Individuals in Crisis Situations (AICS), Tulong Panghanapbuhay sa Ating Disadvantaged/Displaced Workers (TUPAD), at Pantawid Pamilyang Pilipino Program (4Ps), gayundin ang mga cash grant at pensyon para sa mga senior citizen at mga persons with disabilities (PWDs).
Binigyang-diin din ni Pangulong Marcos ang nadagdag na alokasyon sa ilalim ng Local Government Support Fund (LGSF), na aniya’y magpapalakas sa kakayahan ng mga lokal na pamahalaan na tumugon sa mga pangangailangan sa kaunlaran, suportahan ang kabuhayan, at magtayo ng ligtas at matatag na mga komunidad.
“I stand firm in my constitutional duty to ensure the faithful execution of laws. Therefore, I hereby condition the implementation of certain provisions in this Act to conform to existing laws, policies, rules, and regulations,” sinabi pa ng Pangulo.
Kabilang sa mga item sa badyet na sasailalim sa kondisyunal na pagpapatupad ang Engineering and Administrative Overhead Expenses, Payment of Retirement Benefits and Pensions, Capacity Development Programs, at Foreign Service Posts.
Binanggit din ng Pangulo ang mga programa at proyektong ipatutupad alinsunod sa mga legal at regulasyong balangkas, tulad ng School-Based Feeding Program, Medical Scholarship and Return Service Program, PAMANA Program, Residential Care Services to Vulnerable Groups ng mga accredited social welfare and development agencies, pagpapatupad ng mga infrastructure projects ng mga GOCC, at mga programa at proyektong may kaugnayan sa mga senior citizen at persons with disability.
“This shall ensure that these programs promote our long-term development goals,” ayon sa Pangulo.
