Naging matagumpay, sa ikalawang sunod na taon, ang Chess Tournament na inorganisa ng San Fernando Chess Club sa bayan ng San Fernando, Romblon sa pangunguna ng Club President na si Fabert “Nonong” Reyes noong December 7, 2025.
Eksklusibo para sa mga manlalaro mula sa Sibuyan, isinagawa ang torneo sa 7-round format na may 20-minute time limit, at nilahukan ng 28 chess players mula sa iba’t ibang bahagi ng isla.
Itinanghal na overall champion si Mark Froilan Moreno ng Danao matapos siyang makapagtala ng 6 puntos sa pagtatapos ng kompetisyon. Kanya ring naiuwi ang ₱4,000.00 na cash prize.
Nakuha naman ni Josh Galindo ng Danao ang ikalawang puwesto matapos siyang makapag-ambag ng 5.5 puntos, kapalit ng ₱2,500.00 na premyo. Pangatlo si Marc Josef Repizo ng Cajidiocan na may 5.5 puntos din at nakakuha ng ₱2,000.00.
Pumasok sa ikaapat na puwesto ang Club President na si Nonong Reyes ng San Fernando na nagtala ng 5 puntos at nag-uwi ng ₱1,000.00. Nasungkit naman ni Roel Rosales, kapwa taga-San Fernando, ang ikalimang puwesto matapos ding makapag-ambag ng 5 puntos, katumbas ng ₱800.00 na premyo.
Nagkamit ng 4.5 puntos sina Robby Mark Batuigas, Marvin Balani, at Joey Ruga, na nagtapos bilang ika-6, ika-7, at ika-8, at tumanggap ng ₱700.00, ₱600.00, at ₱500.00 ayon sa pagkakasunod.
Para naman sa iba pang mga parangal, nakuha nina Joan Bangalisan at Verle Hawod ang Top 1 at Top 2 Adult Player awards. Sa Junior Division, itinanghal na Top 1 at Top 2 sina Genard Rios at Mike Murchante. Sa Female Division, nagwagi sina Krisha Loraigne Rosita at Dharen Vicente bilang Top 1 at Top 2.
Layunin ng torneo na hikayatin ang kabataan at maging ang mga magulang na tuklasin at pagyamanin ang larong chess, pati na rin ang makatuklas ng mga batang manlalarong maaaring hasain upang maging susunod na henerasyon ng chess masters mula sa isla ng Sibuyan.
Kabilang sa mga kilalang top players mula sa isla sina the late NM Dr. Jenny Tarrosa Mayor at Arena Grand Master Engr. Joseph Galindo, na nagsisilbing inspirasyon sa mga susunod pang manlalaro ng Sibuyan.
