Nanawagan ang Department of the Interior and Local Government (DILG) sa lahat ng lokal na pamahalaan na paigtingin ang paghahanda sa paglapit ng Tropical Storm Fung-wong, na inaasahang lalakas pa at papasok sa Philippine Area of Responsibility (PAR) bilang super typhoon Uwan ngayong linggo.
Ayon sa DILG, kailangang linisin agad ng mga LGU ang mga daluyan ng tubig at drainage systems, inspeksyunin ang mga kalsada at tulay, at tiyaking handa ang mga evacuation center na may sapat na suplay.
Pinag-iingat din ang mga Local Disaster Risk Reduction and Management Councils (LDRRMCs) na paghandaan ang preemptive evacuation lalo na sa mga lugar na mataas ang panganib sa pagbaha, landslide, at storm surge.
Bahagi ito ng panawagan ni Pangulong Ferdinand Marcos Jr. para sa mas maagap na disaster preparedness at mas matatag na lokal na pamamahala upang maprotektahan ang buhay at kabuhayan sa harap ng papalakas na mga bagyo.
Inatasan din ang mga LGU na ihanda ang kanilang emergency response teams at rescue units, at siguraduhing naka-standby ang mga kagamitan at relief goods para agad na maipamahagi sakaling manalasa ang bagyo.
Batay sa pinakahuling abiso, ang umiiral na tropical storm ay inaasahang lalakas pa at posibleng mag-landfall ngayong weekend bilang super typhoon Uwan, na maaaring magdala ng Tropical Cyclone Wind Signal No. 5 sa bahagi ng Northern at Central Luzon.
