Umani ng batikos mula sa mga residente at netizens ang isang road project ng Department of Public Works and Highways (DPWH) sa loob ng Buyco Estate sa bayan ng Ferrol at Odiongan, Romblon, dahil umano sa kakaunti lamang ang makikinabang dito.
Ang proyekto, tinatayang nagkakahalaga ng ₱142.57 milyon, ay nakakontrata sa Sunwest Construction and Development Corporation na inuugnay kay Ako Bicol Partylist Zaldy Co.
Batay sa dokumentong nakuha ng Romblon News Network mula sa DPWH, ang proyekto ay may titulong “Construction of Bgy. Anahao-Tubigon Leading to Bagulayag Beaches” na sinimulan noong Marso 2024.
Gayunman, kinuwestiyon ng netizens kung para kanino nakatuon ang proyekto.
Ayon sa kanila, hindi ito direktang makatutulong sa mga magsasaka o sa pang-araw-araw na biyahe ng mga residente, kundi mas magsisilbing access road patungo sa planong housing subdivision at sa mga private beach properties sa Tubigon.
Dagdag pa rito, pinuna rin ang ilang bahagi ng pondo gaya ng mahigit ₱236,000 para sa renta ng service vehicle, ₱618,000 para sa traffic management kahit halos walang trapiko sa lugar, at ₱12,945 para sa project billboard na umano’y hindi nakita ng mga residente.
Sa gitna ng mga tanong, iginiit ng mga netizens na mas dapat bigyang prayoridad ang mga kalsadang magsisilbi sa mas maraming tao at direktang makatutulong sa kabuhayan ng mga mamamayan.
Wala pang pahayag ang DPWH kaugnay sa nasabing ulat.
