Kinumpirma ni Philippine Ambassador to the United States Jose Manuel “Babe” Romualdez na nagsumite ang Estados Unidos ng dokumento sa Department of Justice ukol sa hiling na extradition kay Pastor Apollo Quiboloy.
Ayon sa opisyal, nagsimulang magpadala ng extradition request ang US government noong buwan ng Hunyo.
Si Quiboloy, na ang tagapagtatag ng Kingdom of Jesus Christ, ay wanted sa US dahil sa alegasyong pagkakasangkot sa labor trafficking scheme. Iniuulat na nanghihingi siya ng donasyon mula sa mga miyembro para sa isang huwad na kawanggawa, ngunit anito ay ginagastos niya ang perang nakokolekta sa marangyang pamumuhay.
Ang kasunduan sa extradition treaty ay pinirmahan noong 1994 ng United States at Pilipinas.
Ang proseso ay isinasagawa sa pamamagitan ng diplomatic channel, kung saan kailangang isumite ang mga dokumento na magpapatunay sa pagkakakilanlan at lokasyon ng taong hinahanap.
Ayon sa kasunduan, responsibilidad ng Pilipinas na agad na ipaalam sa US ang kanilang desisyon kaugnay sa extradition sa pamamagitan ng diplomatic note.
Kapag naaprubahan ang kahilingan, magtutulungan ang parehong bansa upang maitakda ang oras at lugar para sa pagsuko ng taong hinahanap. Ang proseso ay nakabatay sa mga inilatag na probisyon sa extradition treaty na nagsusulong ng pagkakasundo sa pagitan ng dalawang bansa para sa ekstradisyon.
