Sa isinagawang pagdinig, kinuwestyon ng ilang senador kung bakit mas mahal ang konstruksyon ng mga silid-aralan ng Department of Education (DepEd) at Department of Public Works and Highways (DPWH) kumpara sa mga proyekto ng mga lokal na pamahalaan at pribadong sektor.
Ayon kay DepEd Assistant Secretary Aurelio Paulo Bartolome, umaabot sa ₱2.6 milyon hanggang ₱3.8 milyon ang karaniwang gastos sa bawat silid-aralan na ipinatatayo ng DepEd at DPWH. Sa ilang probinsya naman, mas mababa ang presyo: sa Dumaguete, nakakagawa ng classroom ang ilang NGO sa ₱1.5 milyon at ang LGU sa ₱2.1 milyon; sa Iloilo, nasa ₱1.35 milyon lamang kada classroom.
“I cannot imagine… the cost is almost double. So, the backlog in classrooms will be halved with the budgets that we have,” ayon kay Senador Loren Legarda, na naniniwalang mas mapapabilis ang pagpapatayo kung pribadong kontratista ang gagawa.
Hiniling ni Senador Bam Aquino na busisiin ang presyo ng materyales tulad ng semento, bakal at kahoy para matukoy kung makatwiran ang mataas na presyo ng DepEd. “If we can construct classrooms at ₱1.5 million to ₱2 million, maybe we can double the number of classrooms we can build,” aniya.
Batay sa datos ni Senador Sherwin Gatchalian, tinatayang ₱413 bilyon ang kakailanganin upang masolusyunan ang kakulangan sa 165,000 silid-aralan sa bansa.
Nanawagan din si Senador Raffy Tulfo ng dagdag na pondo para pondohan ang konstruksyon ng mas maraming silid-aralan at iba pang pasilidad gaya ng mga palikuran sa mga paaralan.
Lumabas sa pagdinig na posibleng makaapekto sa pagtugon sa classroom backlog ang malaking agwat ng presyo, kaya nananawagan ang mga senador ng mas malinaw na paliwanag at mas transparent na procurement process mula sa DepEd.
