Nanawagan si Senador Benigno “Bam” Aquino ng masusing pagsusuri sa paggastos ng Department of Public Works and Highways (DPWH) sa P360 bilyong pondo para sa flood control projects ngayong taon, kasabay ng patuloy na pagbaha sa iba’t ibang panig ng bansa.
Sa inihaing resolusyon, hinikayat ni Aquino ang mga komite ng Senado na magsagawa ng imbestigasyon upang malaman kung epektibo at napupunta ba sa tamang lugar ang mga proyekto ng DPWH.
Binigyang-diin ng senador na mula 2009 hanggang 2024 ay umabot na sa P1.47 trilyon ang kabuuang flood control budget, ngunit nananatili pa ring bulnerable sa pagbaha ang maraming komunidad.
“Hindi sapat ang infrastructure kung hindi ito nakabase sa siyensiya at sa aktuwal na pangangailangan ng mga komunidad,” ani Aquino.
Kasabay nito, lumitaw din ang mga ulat ng umano’y pekeng flood control projects na pinaboran ang ilang piling contractors. Sa hiwalay na pagdinig ng Senate Blue Ribbon Committee, tinukoy ang halos P100 bilyong halaga ng proyekto na posibleng may anomalya—kabilang ang mga hindi natapos, hindi kailangan, o paulit-ulit sa parehong lugar.
Giit ni Aquino, mahalaga ang transparency at accountability sa paggastos ng pondo dahil direktang nararamdaman ng mamamayan ang epekto ng pagbaha, mula sa pagkasira ng ari-arian hanggang sa banta sa kanilang buhay.
“Hindi lang ito usapin ng pera. Usapin ito ng kaligtasan, ng kabuhayan, at ng tiwala ng taumbayan sa pamahalaan,” dagdag ng senador.
Inaasahang tatalakayin ng Senado ang naturang resolusyon sa susunod na sesyon, habang nagpapatuloy ang malalakas na pag-ulan at pagbaha sa ilang rehiyon.
