Nakapagtala ng pinakamababang marka ang Romblon State University (RSU) sa isinagawang 2024 Agency Performance Review ng Department of Budget and Management (DBM), na tinatawag ding Budget ng Bayan Monitor.
Batay sa ulat, kabilang ang RSU sa 308 national government agencies at state universities and colleges (SUCs) na sinuri ng DBM ngayong taon. Umabot lamang sa 1.85 out of 5 ang nakuha nitong grado, dahilan para maituring itong Poor o pinakamababa sa lahat ng ahensya at SUCs na inassess.
Sa naturang review, 95% ng mga sinuring ahensya ang nakakuha ng Outstanding, Very Satisfactory, o Satisfactory rating. Labinlima ang napabilang sa “Unsatisfactory” list, kabilang ang Department of Finance, Department of Transportation, Department of Tourism, Bureau of Customs, at ilan pang SUCs gaya ng Marinduque State College, Bicol University, Technological University of the Philippines, at Rizal Technological University.
Ayon sa DBM, ang naging batayan ng grading ay ang paggamit ng pondo, pagtupad sa target na proyekto, kalidad at oras ng pagsusumite ng ulat, at iba pang performance indicators.
Paliwanag ni Budget Secretary Amenah Pangandaman, tutulungan ng DBM ang mga institusyong nakakuha ng mababang grado upang matukoy ang mga pagkukulang, partikular sa procurement processes at project planning.
“Help these agencies. Tingnan natin saan ba nagkamali—baka sa pagpaplano pa lang ng mga proyekto at programa, meron nang mali doon,” ani Pangandaman.
Bagama’t walang direktang parusa ang mga nasa Unsatisfactory at Poor rating, binigyang-diin ng DBM na maaari itong makaapekto sa budget allocation ng mga ahensya para sa susunod na fiscal year.
Samantala, 14 na ahensya ang nakakuha ng perfect score na 5 o “Outstanding,” kabilang ang Civil Service Commission, Mines and Geosciences Bureau, Philippine Information Agency, Biliran Province State University, at Cagayan State University.
Binati naman ni Executive Secretary Lucas Bersamin ang naturang review at sinabing mahalagang makita ng mga ahensya ang kahinaan at lakas ng kanilang operasyon upang makapaghanda ng mas maayos na plano sa mga susunod na taon.
Sinusubukan pang kunan ng pahayag ng Romblon News Network ang Romblon State University kaugnay sa ulat na ito ng Department of Budget and Management.
